Ադրբեջանից ստացվել է Բաքվի և Ստեփանակերտի միջև երկխոսության հավաստիացում․ Միրզոյան
«Ի սկզբանե, երբ մենք Ադրբեջանի հետ նախաձեռնում էինք խաղաղության պայմանագրի շուրջ քննարկում, ընկալում և պայմանավորվածություն եղավ՝ այդ բանակցությունները վարել երկու հիմնական ուղղություններով. մեկը ՀՀ-ի և Ադրբեջանի միջև հարաբերությունների հաստատման, կարգավորման շուրջ, և մյուսը, անշուշտ, ձևաչափ, հարթակ, որտեղ պետք է քննարկվի ԼՂ-ում ապրող բնակչության, հայության իրավունքներն ու անվտանգությունը»,- հայտարարել է ՀՀ ԱԳ նախարար Արարատ Միրզոյանը։
Ըստ նրա՝ Ադրբեջանը տևական ժամանակ խուսանավել է այդ խոսակցության մեջ ներգրավվելուց. «Մյունխենում՝ ոչ միայն պանելային քննարկման ժամանակ, այլև Բլինքեն-Ալիև-Փաշինյան հանդիպման ընթացքում, ստացել ենք ադրբեջանական կողմի պատրաստակամությունը, հավաստիացումն առ այն, որ Բաքվի և Ստեփանակերտի միջև միջազգայնորեն տեսանելի երկխոսություն պետք է տեղի ունենա:
Մյուս կողմից, մենք վերջին տարիների ընթացքում շարունակաբար տեսել ենք՝ ձեռք են բերվել պայմանավորվածություններ, տրվել հավաստիացումներ, խոստումներ, հետո նահանջ է եղել այդ դիրքորոշումից, ընդհուպ՝ մինչև ստորագրված, հանրահայտ պայմանավորվածություններից։ Հուսամ՝ այս անգամ այդ դեպքը չի լինի»
