ՄԻԵԴ-ում գերեվարվածներին վերաբերող 3 անհատական գործ մտել է ակտիվ կոմունիկացիայի փուլ. Սիրանուշ Սահակյան. ԶԼՄ

Մարդու իրավունքների Եվրոպական դատարանում (ՄԻԵԴ) երեք անհատական գործ մտել է ակտիվ կոմունիկացիայի փուլ: Այս մասին NEWS.am-ի հետ զրույցում ասել է Միազգային եւ համեմատական իրավունքի կենտրոնի նախագահ Սիրանուշ Սահակյանը:

Սահակյանն ասել է, որ բուն գործի էության վերաբերյալ դատարանը հարցադրումներ է ուղղել Ադրբեջանին.

«Եթե նախկին գործընթացի շրջանակում հարցադրումներն առնչվում էին բացառապես անհապաղ միջոցների կիրառությանը, ապա ներկայումս էության վերաբերյալ հարցադրումներ կան: Հաշվի առնելով, որ գործընթացը տեղաշարժվել է, ակնկալիք ունենք, որ մյուս անհատական գործերով կարճ ժամանակ անց եւս կլինի կոմունիկացիա՝ էության վերաբերյալ: Անհապաղ միջոցները վերացել են այն աձնանց առնչությամբ որոնք հայրենադարձվել են, իսկ նրանք, ովքեր դեռ վերադարձված չեն եւ անկախ նրանից՝ Ադրբեջանն ընդունում է, թե՝ ոչ, անհապաղ միջոցներ շարունակում են գործել»:
 

Սիրանուշ Սահակյանը նշել է, թե որոնք են այդ երեք գործերը.
 

«Գործերից մեկը վերաբերում է հայրենադարձված գերու, որը խոշտանգվել է Ադրբեջանում գտնվելու ընթացքում: Մյուսն առնչվում է ռազմագերու գնդակահարությանը Ադրբեջանի զինված ուժերի ներկայացուցիչների կողմից: Երրորդն առնչվում է զինծառայողի մարմնի նկատմամբ ոտնձգությանը:

Մարմնի տարբեր մասերի նկատմամբ արվել է միջամտություն և ավելին, այդ միջամտությունը ցուցադրող կադրերը լայնորեն տարածվել են, ինչը նաեւ անձանց մասնավոր կյանքի անձեռմխելիությանխնդիրներ է առաջ բերում եւ անհամաչափ ցավ, տառապանք է պատճառում նաեւ հարազատներին»:

Հարցին, թե ո՞ր ժամանակաշրջանի դեպքերին են վերաբերում գործերը Սահակյանն ասել է. «Ունենք գործ, որը վերաբերում է սեպտեմբերյան մարտերին: Ունենք գործ, որն առնվում է բուն 44-օրյա պատերազմին: Ունենք գերեվարման դեպք, որը տեղի է ունեցել մինչեւ պատերազմը»:

Սահակյանն ասել է, որ Եվրոպական դատարանը Ադրբեջանին ժամկետներ է տրամադրել՝ առարկություններ ներկայացնելու համար: