Սառը պատերազմից հետո ռուսական նավերն առաջին անգամ դուրս են եկել ծով միջուկային զենքով. NIS

Նորվեգիայի հետախուզական ծառայությունը (NIS) հրապարակել է իր տարեկան զեկույցը, որում նշվում է, որ Ռուսաստանի հյուսիսային նավատորմի նավերը 30 տարվա մեջ առաջին անգամ սկսել են ծով դուրս գալ տակտիկական միջուկային զենքով։ Այս մասին գրում է RTVI-ը։

Փաստաթղթի համաձայն՝ խորհրդային տարիներին Հյուսիսային նավատորմի նավերը մարտավարական միջուկային զենքերով սիստեմատիկորեն ծով են դուրս եկել, սակայն Սառը պատերազմի ավարտից հետո նման դեպքեր չեն գրանցվել։ 

NIS-ը կարծում է, որ Ուկրաինայում ռազմական գործողությունների բռնկումից հետո «միջուկային զենքի նշանակությունը Ռուսաստանի համար զգալիորեն աճել է»։

Նորվեգական հետախուզության տվյալներով՝ միջուկային ներուժի կենտրոնական մասը տեղադրվել է Հյուսիսային նավատորմի սուզանավերի և վերգետնյա նավերի վրա։

«Միջուկային զենքը լուրջ վտանգ է ներկայացնում այն ​​գործողությունների դեպքերում, որոնց կարող են մասնակցել ՆԱՏՕ-ի երկրները»,- նշվում է զեկույցում։

2022 թվականի սեպտեմբերի 21-ին ՌԴ նախագահ Վլադիմիր Պուտինը հայտարարեց, որ «երբ մեր երկրի տարածքային ամբողջականությունը վտանգվի, մենք, անկասկած, կօգտագործենք մեր տրամադրության տակ եղած բոլոր միջոցները Ռուսաստանին և մեր ժողովրդին պաշտպանելու համար»: Երկրի ղեկավարի խոսքով՝ դա ներառում է միջուկային զենքի օգտագործումը՝ հավելելով. «սա բլեֆ չէ»։

Politico-ն գրել է, որ ԱՄՆ հետախուզությունը և նրանց դաշնակիցները ուժեղացրել են Ռուսաստանի հսկողությունը և փորձում են պարզել՝ արդյոք Պուտինը հրամայել է միջուկային զենք օգտագործել Ուկրաինայում։

 Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևը նույնպես բազմիցս խոսել է միջուկային զենքի կիրառման մասին։ Սեպտեմբերին նա ասել էր, որ «Ռուսաստանն իրավունք ունի անհրաժեշտության դեպքում միջուկային զենք կիրառել»։ 

Ըստ Մեդվեդևի՝ միջուկային զենքի կիրառումը թույլատրելի է Ռուսաստանի կամ նրա դաշնակիցների վրա հարձակման դեպքում՝ «այս տեսակի սպառազինության կիրառմամբ», կամ եթե վտանգ կա ռուսական պետության գոյության նկատմամբ։