Ռուսաստանի դեսպանը կանչվել է Մոլդովայի ԱԳՆ. պատճառը հայտնի է
Ռուսաստանի դեսպան Օլեգ Վասնեցովը կանչվել է Մոլդովայի արտաքին գործերի և եվրոպական ինտեգրման նախարարություն՝ հանրապետության տարածքով հրթիռի թռիչքի մասին հաղորդագրությունների առնչությամբ։ Այս մասին հայտնել են Մոլդովայի ԱԳՆ-ում, հայտնում է Sputnik Moldova Telegram ալիքը։
«Մոլդովայի դիվանագիտության ղեկավարը կարգադրել է Քիշնևում Ռուսաստանի Դաշնության դեսպան Օլեգ Վասնեցովին շտապ կանչել ԱԳՆ՝ ռուսական կողմին մատնանշելու մեր օդային տարածքի անընդունելի խախտումը ռուսական հրթիռի միջոցով», - հայտնել են նախարարությունից։ ԱԳՆ-ի խոսնակ Դանիել Վոդան նաև նշել է, որ Քիշնևը վճռականորեն մերժում է հանրապետության նկատմամբ վերջին ոչ բարեկամական գործողություններն ու հայտարարությունները։
Նախօրեին հայտնի դարձավ Մոլդովայի վրայով հրթիռի հավանական թռիչքի մասին տեղեկությունը: Մոլդովայի պաշտպանության նախարարությունը հաստատել է երկրի օդային տարածքի խախտման մասին տեղեկությունը։
