2027 թ-ի մարմնամարզության Եվրոպայի առաջնությունը կկայանա Հայաստանում

 2027 թվականին կայանալիք տղամարդկանց և կանանց սպորտային մարմնամարզության Եվրոպայի առաջնությունը կկայանա Երևանում, այս մասին  լրագրողների հետ հանդիպման ժամանակ ասաց Հայաստանի մարմնամարզության ֆեդերացիայի նախագահ Գագիկ Վանոյանը:

Նրա խոսքով՝ կար մեծ ցանկություն Հայաստանում կազմակերպել միջազգային որևէ մրցաշար,  հատկապես որ ունեն լավ արդյունքներ մարմնամարզությունից։

«Ֆեդերացիայում մի շարք քննարկումներից հետո, կառավարության աջակցությամբ  դիմել ենք միջազգային ֆեդերացիային: Ունենք աշխարհի, Եվրոպայի չեմպիոն, ուստի այդ արդյունքները նպաստեցին, որ միջազգային ֆեդերացիան կողմից մերզ տրվի այդ հնարավորությունը՝  Հայաստանում անցկացնելու նման բարձրակարգ մրցաշար։ Իհարկե, դա հսկայական ծախսերի հետ է կապված, բայց կառավարության շնորհիվ կարողացանք իրականություն դարձնել մեր մեծ երազանքը` Եվրոպայի առաջնությունն անցկացնել Երևանում»,- նշեց Գագիկ Վանոյանը։

Ֆեդերացիայի նախագահի խոսքով` այս մրցաշարը լավագույններից մեկն է լինելու` չնայած որ մեծ աշխատանք ունեն անելու: Գերմանիան և Անգլիան ևս ցանկություն էին հայտնել 2027 թվականի առաջնությունն անցկացնել իրենց երկրներում։

«Եվրոպայի առաջնության անցկացումը մեծ իրադարձություն է: Սա մեր երազանքն էր, ի վերջո սրանով  լուծվում է մարմնամարզության ապագայի հարցը: Այն դժվարությունները, որոնք տեսել են մենք, մեր չեմպիոնները, այս առանջնության անցկացումից հետո երիտասարդները չեն տեսնի»,- հավելեց Հայաստանի մարմնամարզության հավաքականի գլխավոր մարզիչ Հակոբ Սերոբյանը։

Ըստ Վանոյանի՝  Հայաստանը կունենա միջազգային չափանիշներին համապատասխան 4 մարզադահլիճ և  մոտ 20 տարի մեր երկիրը մարզագույքի առումով ոչ մի խնդիր չի ունենա։