«Ուկրաինան ձեզ զգուշացրել էր». սկանդալային հայտարարությունից հետո Իրանում Ուկրաինայի դեսպանը կանչվել է երկրի ԱԳՆ

 Ուկրաինայի նախագահի գրասենյակի ղեկավարի խորհրդական Միխայիլ Պոդոլյակի հայտարարությունից հետ Իրանի արտգործնախարարություն է կանչվել երկրում Ուկրաինայի դեսպանը։ Այս մասին հայտնում է իրանական Tasnim գործակալությունը։

Դեսպանին խնդրել են բացատրել Պոդոլյակի հայտարարությունը, որով վերջինս նախօրեին անուղղակիորեն ընդունել էր Ուկրաինայի մասնակցությունը Սպահանում Իրանի պաշտպանության նախարարության վրա տեղի ունեցած հարձակման մեջ: Հիշեցնենք, որ Զելենսկու գրասենյակի ղեկավարի խորհրդականն ասել էր. «Ուկրաինան ձեզ զգուշացրել էր»։

Իրանի արտաքին գործերի նախարարության ներկայացուցիչ Նասեր Քանաանին դատապարտել է պաշտոնյայի «թշնամական և սադրիչ դիրքորոշումը», «կասկածելի» է անվանել վերջինիս հայտարարությունները` Սպահանի ռազմական համալիրի դեմ ավերիչ գործողության վերաբերյալ։ Իրանը ուկրաինական կողմից պաշտոնական և հստակ բացատրություն է պահանջել, ասվում է նախարարության մամուլի հաղորդագրության մեջ։

Հիշեցնենք, որ ունվարի 28-ի լույս 29-ի գիշերը անհայտ երկրի անօդաչու թռչող սարքերը հարձակվել էին Իրանի մի քանի ռազմական օբյեկտների վրա: Արաբական լրատվամիջոցների պնդմամբ` հարձակվողը Իսրայելն է եղել։