Թուրքիան ակնկալում է, որ Իրանը կհետաքննի Ադրբեջանի դեսպանատան վրա հարձակումը․ Չավուշօղլու

Թուրքիան ակնկալում է, որ Թեհրանը կհամագործակցի Բաքվի հետ Ադրբեջանի դեսպանատան վրա զինված հարձակման հարցում և կպարզաբանի միջադեպի պատճառները։ Այս մասին  հայտարարել է արտգործնախարար Մևլութ Չավուշօղլուն։

Ավելի վաղ Ադրբեջանի ԱԳՆ-ն հայտնել էր, որ ուրբաթ օրը Իրանում Ադրբեջանի դեսպանատան վրա հարձակման արդյունքում մեկ մարդ զոհվել է, երկուսը՝ վիրավորվել։ Թեհրանի ոստիկանական բաժանմունքի ղեկավարի խոսքով՝ հարցաքննության ժամանակ ձերբակալված հարձակվողը բացատրել է իր քայլի դրդապատճառները՝ ասելով, որ գնացել է այդ քայլին անձնական ու ընտանեկան խնդիրներից ելնելով։ 

Իրանի մայրաքաղաքի ոստիկանական բաժանմունքի ղեկավար Հոսեյն Ռահիմիին հարցաքննության ժամանակ տղամարդն ասել է, որ փորձում է ազատել կնոջը, որը, ինչպես ինքն էր կարծում, երկար ժամանակ գտնվում էր դեսպանատան չորրորդ հարկում։

«Մենք ակնկալում ենք համագործակցություն մեր հարևանից՝ Իրանից, ադրբեջանական կողմի հետ այս ահաբեկչության հարցում։ Պետք է հասկանալ, թե ով է կանգնած դրա հետևում, ինչու է կատարվել այս արարքը: Այս հարցի շուրջ տեղեկատվության բաց փոխանակում է անհրաժեշտ: Մենք դա կարևորում ենք: Անհրաժեշտ է պատասխանատվության ենթարկել նրանց, ովքեր կանգնած են թիկունքում, ես ևս մեկ անգամ իմ ցավակցությունն եմ հայտնում եղբայրական Ադրբեջանին, Ադրբեջանը երբեք ոչ մի տեղ մենակ չի լինի», - շաբաթ օրը լրագրողներին ասել է Չավուշօղլուն։