ԱԺ-ում պարգևավճարների ֆոնդը կրճատվել է․ ովքեր այսուհետ չեն ստանա դրամական խրախուսանք
ԱԺ-ի սպասարկող անձնակազմը ստորագրահավաք է սկսել՝ պահանջելով վճարել իրենց պարգևավճարները։ Բանն այն է, որ իշխանափոխությունից հետո, բացի պետական ծառայողներից, խորհրդարանի ղեկավարությունը պարգևավճար է հատկացրել նաև ԱԺ տեխնիկական ու սպասարկող անձնակազմին. մոտ չորս տարի տվել է, հիմա՝ կտրել: Այս մասին գրում է Hraparak.am-ը։
Պարգևավճարներից զրկվածները զայրացած են, որ իրենց առանձնացրել են բոլորից ու բաժանարար գիծ քաշե: «Երբ իրենք նոր էին մտել խորհրդարան, լավ տղա էին խաղում, սրտացավ էին ձևանում, որ հավատանք ու վստահենք: Իսկ հիմա, երբ իրենց կարծիքով՝ մեզ իրենցով են արել, երեք մատի գործողություն են ցույց տալիս»,-ասել է պարգևավճար չստացած աշխատակիցներից մեկը:
Auroranews-ը կապ հաստատեց ՀՀ ԱԺ նախագահի մամուլի քարտուղար Ծովինար Խաչատրյանի հետ՝ հասկանալու, թե ինչ է կատարվում ԱԺ աշխատակազմում։
«Աժ նախագահին դիմել են ՔՊ կուսակցության որոշ պատգամավորների օգնականներ, որպեսզի ստանան պարգևավճար, սակայն օրենքով այդ պարգևավճարը հասնում է միայն պետծառայողներին։ Նրանց կիսամյակային պարգևավճար է վճարվում տարեկան 2 անգամ, սա տվյալ պարգևավճարն է, որն օգնականներին չի հասնում»,-մեզ հետ զրույցում ասաց Խաչատրյանը։
Խաչատրյանը նշեց, որ պատգամավորների օգնականները նախկինում ստացել են պարգևավճար, քանի որ աշխատավարձերը բարձր չեն եղել, իսկ ԱԺ-ն ունեցել է խնայողություն։
ԱԺ խոսնակը հավելեց նաև, որ պարգևավճարների ֆոնդը կրճատվել է։
