«Կրեմլը պետք է պարտվի». Զելենսկին` Ռամշտայն ավիաբազայում հանդիպմանը

Մեկնարկել է Ուկրաինայի դաշնակիցների հանդիպումը գերմանական Ռամշտայն ավիաբազայում։ Այն նվիրված է Ուկրաինային ռազմական աջակցության ուժեղացմանը, այդ թվում՝ ծանր տեխնիկայի մատակարարմանը: Հանդիպմանը մասնակցում են ավելի քան 50 երկրի պատվիրակություններ։

«Կիևին աջակցությունը կտևի այնքան ժամանակ, որքան անհրաժեշտ է»,-ասել է Պենտագոնի ղեկավար Լլոյդ Օսթինը և շեշտել, որ Կիևին կշարունակվի զենքի տրամադրումը, քանի դեռ հակամարտությունը չի ավարտվել: Օսթինը նաև հիշեցրել է Կիևին 2,5 միլիարդ դոլար արժողությամբ ռազմական օգնության նոր փաթեթը, որը ամենամեծն է լինելու պատմության մեջ:

Հանդիպմանը ելույթ է ունեցել նաև Ուկրաինայի նախագահ Վոլոդիմիր Զելենսկին։ Նա հայտարարել է, որ Մոսկվայի գլխավոր զենքը ժամանակն է, ու պահանջել է մեծացնել զենքի մատակարարումն Ուկրաինայի զինված ուժերին։

«Կրեմլը պետք է պարտվի»,-ասել է Զելենսկին:

Սպասվում է, որ այսօրվա հանդիպման ժամանակ դաշնակիցները կքննարկեն Կիևին ծանր տանկեր մատակարարելու պատրաստ երկրների դաշինքի ստեղծման հարցը։ Խոսքն առաջին հերթին Leopard 2-ի մասին է։ Լեհաստանը, Դանիան և Ֆինլանդիան հայտարարել են դրանք Ուկրաինայի զինված ուժերին ուղարկելու պատրաստակամության մասին։ Որևէ երկիր չի կարող Leopard-ը փոխանցել առանց այդ տանկերն արտադրող Գերմանիայի թույլտվության: Սակայն Լեհաստանի իշխանությունները հայտարարել են, որ պատրաստ են գնալ այդ քայլին առանց Բեռլինի համաձայնության։