Ադրբեջանից բողոքում են Բաքվի նկատմամբ կիրառվող «միջազգային երկակի ստանդարտներից»

 Ադրբեջանի արտգործնախարարությունից դժգոհել են  Լաչինի միջանցքի փակման մասով մի շարք  միջազգային կազմակերպությունների ու երկրների արձագանքից: Ադրբեջանի ԱԳ փոխնախարար Խալաֆ Խալաֆովը մասնավորապես ասել է.

«Ինչպես գիտեք, բնապահպան ակտիվիստները և հասարակական կազմակերպությունների ներկայացուցիչներ հանքավայրերի ապօրինի շահագործման բողոքի ակցիա են իրականացնում այն տարածքներում, որտեղ ժամանակավորապես տեղակայված են ռուս խաղաղապահները։ Ցավոք, ինչպես 90-ականներին, այսօր ևս մենք վկա են նրա, թե ինչպես երկակի ստանդարտներ են կիրառվում Ադրբեջանի նկատմամբ»,- ասել է Ադրբեջանի ԱԳ փոխնախարարը։ 

Նա փաստացի հաստատել է, որ ակցիան կազմակերպել են Ադրբեջանի իշխանությունները՝ չթաքցնելով, որ  ակցիայի նպատակը բնավ էլ բնապահպանական չէ, այլ Լաչինի միջանցքի նկատմամբ վերահսկողություն սահմանելը։ 

Փոխնախարարը հայտարարել է. «Ակցիան իրականացվում է ադրբեջանական հողի վրա: Ադրբեջանի ժողովուրդը պահանջելու է իրավունքի վերականգնում  և կհասնի  իր նպատակին` անկախ մեր դեմ կիրառվող երկակի ստանդարտների։ Ադրբեջանը, որպես իր տարածքների անվտանգության երաշխավոր, բոլոր իրավունքներն ունի ապահովելու Լաչինի միջանցքի լիակատար վերահսկողությունը՝ մեր ինքնիշխան իրավունքներին համապատասխան։ Իրականացվող ակցիան հասարակական-քաղաքական շարժում է, այն արտացոլում է, որ ադրբեջանցի ժողովուրդը իր հողի և բնական պաշարների տերն է՝ որպես 2020 թվականի 44-օրյա պատերազմում տարած հաղթանակի արդյունք»,-ասել է պետգործիչը։