Մի խումբ ոչ կառավարական կազմակերպություններ և Բրազիլիայի Կենդանիների բարեկեցության և պաշտպանության ազգային ֆորումը հայց են ներկայացրել ընդդեմ Բրազիլիայի ֆուտբոլի կոնֆեդերացիայի՝ պահանջելով 1 միլիոն ռեալ (200,000 դոլար): Այս մասին գրում է ТАСС-ը` հղում տալով արգենտինական El Grafico ամսագրին:
 

Նշվում է, որ դրա համար պատճառ է դարձել Քաթարում ընթացող ֆուտբոլի աշխարհի առաջնությունում կայացած մամուլի ասուլիսի ժամանակ ազգային հավաքականի մամուլի պատասխանատու Վինիսիուս Ռոդրիգեսի կողմից կատվի նկատմամբ կոպիտ վերաբերմունքը։ 

Հիշեցնենք, որ դեկտեմբերի 7-ին կայացած ասուլիսի ժամանակ Ռոդրիգեսը կոպիտ կերպով կատվին մորթուց բռնելով սեղանից ցած էր գցել:

Հայցվորները նաև հրապարակային ներողություն են պահանջել, ինչպես նաև կոնֆեդերացիայի աշխատակիցների համար շրջակա միջավայրի պաշտպանության և կենդանիների խնամքի հարցերում վերապատրաստման ծրագիր:

Հիշեցնենք, որ Բրազիլիայի հավաքականն աշխարհի առաջնության քառորդ եզրափակիչում 11 մետրանոց հարվածաշարում պարտվեց խորվաթներին։