Պեսկովը` Ռուսաստանի և Թուրքիայի հարաբերությունների մասին
Սիրիայի իրադրության շուրջ Ռուսաստանի և Թուրքիայի միջև տարաձայնություններ կան, բայց երկրների միջև հարաբերությունների մակարդակը թույլ է տալիս դրանք երկխոսության միջոցով լուծել։ Այս մասին ասել է ՌԴ նախագահի մամուլի քարտուղար Դմիտրի Պեսկովը «Մոսկվա։ Կրեմլ։ Պուտին» հաղորդման ժամանակ։
«Սիրիայի հարցում Թուրքիայի հետ տարաձայնություններ կան։ Մի անգամ դրանք հաջողվել է լուծել։ Սոչիում փաստաթուղթ է ստորագրվել․.. Մեր հարաբերությունների մակարդակը և քաղաքական իմաստությունը թույլ են տալիս մեզ կարգավորել նման տարաձայնությունները ոչ թե առճակատման, այլ թեև երկար ու լարված, բայց, այնուամենայնիվ, բանակցությունների միջոցով», - ասել է Պեսկովը։
Հիշեցնենք, որ Թուրքիան նոյեմբերի 20 -ից օդային գործողություն է իրականացնում երկրում արգելված «Քրդական աշխատավորական կուսակցության» (ՔԱԿ) սիրիական թևի դեմ Սիրիայի հյուսիսում։ Հաղորդվում էր Քոբանի քաղաքին, ինչպես նաև Իրաքի հյուսիսին հասցվող հարվածների մասին: Թուրքիայի նախագահ Ռեջեփ Թայիփ Էրդողանը գործողությունը հաջող է անվանել ու չի բացառել, որ դրան կհաջորդի նաև ցամաքային փուլը:
