Վրաստանում տուգանքները չվճարած օտարերկրացիների մուտքը երկիր կարգելվի

Արտասահմանյան համարանիշներով մեքենաների սեփականատերերը, որոնք չեն վճարի տուգանքը, հաջորդ անգամ չեն կարողանա մուտք գործել Վրաստան, գրում է Sputnik Գրուզիան:

Նշվում է, որ Վրաստանի խորհրդարանը քննարկում է օտարերկրյա պետհամարանիշներով ավտոմեքենաների երթևեկության կանոնները խախտելու համար տուգանքների վերաբերյալ փոփոխությունները:
 

Փոփոխությունների համաձայն՝ ՆԳՆ կայքում խախտման մասին հրապարակումից 30 օր անց կհամարվի, որ խախտողը տեղեկացվել է։ 30 օրվա ընթացքում չվճարելու դեպքում տուգանքին տույժ կգումարվի։ 
 

«Այս օրենսդրական կարգավորմամբ նախատեսվում է արտասահմանյան համարանիշներով ավտոմեքենաների վարորդներից գանձել տեսախցիկների արձանագրած խախտումների համար սահմանված տուգանքը»,– նշել է Վրաստանի ՆԳ փոխնախարար Ալեքսանդր Դարախվելիձեն:
 

Բացի այդ, արտասահմանյան համարանիշներով մեքենաների սեփականատերերը, որոնք չեն վճարի տուգանքը, հաջորդ անգամ չեն կարողանա մուտք գործել Վրաստան։ Նշվում է, որ «խելացի» տեսախցիկները վեց ամսում 1 441 576 խախտում են արձանագրել, որոնց ընդհանուր գումարը 66,2 մլն լարի է կազմում։