ԱՀԱԶԱՆԳ. «Գտել են շանը կրակված, ձագերը՝անհետացել են». օրենքի մասին, որը չի գործում
Երեկ Վահագնի թաղամասում հերթական շունն է սպանվել՝ հրազենից արձակված կրակոցից: Այս մասին հայտնեց Auroranews.am ահազանգած քաղաքացի Մարի Տեր-Անտոնյանը:
Շունն ուներ 6 ձագ: Թ՛ե մայր շունը, թե՛ ձագերը խնամվում էին տեղի բնակիչների կողմից: Ճիճվաթափում, պատվաստում, անհրաժեշտ ամեն բան արված է եղել։ Սակայն երեկ շանը կրակված են գտել, իսկ ձագերը՝ անհետացել են:
«Կենդանիների նկատմամբ պատասխանատու վերաբերմունքի մասին» օրենքում 2019 թվականին ԱԺ նախկին պատգամավոր Նաիրա Զոհրաբյանի առաջարկով կատարված լրացման համաձայն՝ կենդանիների հանդեպ նման դաժան վերաբերմունք գործողը պետք է պատժվի: Սակայն մինչ օրս օրենքի գործարկման նախադեպ չի եղել: Պատասխանատվության որևէ մեկը չի ենթարկվել:
«Այս բարձիթողի վիճակն անընդունելի է: Այն մարդն, ով ընդունակ է սպանել կենդանուն, որը որ ձագեր ունի և որը ոչ ոքի չի անհանգստացրել, կարող է նաև նույն սառնասրտությամբ մարդու վրա զենք պարզել: Ավելին, հարց է առաջանում, թե ինչ զենքով է կրակել, գրանցված է եղե՞լ արդյոք, թե՞ ոչ»,- ասաց ահազանգած քաղաքացին:
Քաղաքացի Մարի Տեր-Անտոնյանը նշեց նաև, որ անգամ գրավոր հարցում է ուղարկել ոստիկանություն՝ հասկանալու, թե կենդանիների նկատմամբ դաժան վերաբերմունքի մասով քանի՞ դեպք է գրանցվել, քանի՞ գործ է հարուցվել և ի՞նչ լուծումներ են դրանք ստացել:
Հարցման պատասխանի մեջ նշված է, որ 2020 թ. և 2021թ. գրանցվել է 17-ական, իսկ 2022-ի 6 ամիսների ընթացքում՝ 10 հանցագործության դեպք, որոնցից 2020թ. կարճվել է 3, 2021թ. և 2022 թ. ՝ 1-ական հանցագործություն: Բոլոր քրգործերը կարճվել են՝ հանցակազմի բացակայության մասով:
Ստացվում է՝ օրենքը կա, բայց նախադեպ՝ չկա: Այս տարիների ընթացքում որևէ մեկը պատասխանատվություն չի կրել, իսկ ՀՀ տարբեր մարզերում կենդանիների սպանդը շարունակվում է: 
