Ովքեր չեն կարողանա տաքսի վարել ՌԴ-ում. Պուտինը նոր օրենք է ստորագրել

Ռուսաստանի նախագահ Վլադիմիր Պուտինը օրենք է ստորագրել, որը միջին ծանրության հանցագործությունների, ծանր և առանձնապես ծանր հանցագործությունների համար չմարված դատվածությամբ անձանց արգելում է տաքսի վարել ՌԴ–ում: Համապատասխան օրենքը հրապարակվել է իրավական տեղեկատվության պաշտոնական առցանց հարթակում:

Փաստաթղթի համաձայն՝ արգելքը գործում է ավտոբուսների, տրամվայների, տրոլեյբուսների վարորդների համար, որոնք ունեն չհանված կամ չմարված դատվածություն հասարակական անվտանգության դեմ հանցագործությունների, պետության սահմանադրական կարգի հիմքերի և անվտանգության դեմ հանցագործությունների, խաղաղության ու մարդկության անվտանգության դեմ հանցագործությունների համար, որոնք ՌԴ Քրեական օրենսգրքին համապատասխան ծանր և առանձնապես ծանր հանցագործություններ են։

Արգելքը տարածվում է նաև նրանց վրա, ովքեր համանման հանցանքներ են գործել ԵԱՏՄ երկրների տարածքում։

Տաքսի վարողների համար ցանկը համալրված է նաև այլ հանցագործություններով` սպանություն, մարդու առևանգում, կողոպուտ, ավազակություն, սեռական անձեռնմխելիության և անձի սեռական ազատության դեմ ուղղված հանցագործություններ: Սակայն տաքսու վարորդ աշխատելու արգելքը վերաբերում է ոչ միայն ծանր և առանձնապես ծանր, այլև միջին ծանրության հանցագործությունների համար դատվածություն ունեցողներին։

Նշվում է, որ օրենքի դրույթները տարածվում են այն օտարերկրացիների վրա, որոնք ԵԱՏՄ անդամ պետությունների քաղաքացիներ են: