Պեսկովը` Ռուսաստանի և Ուկրաինայի համատեղ փաստաթղթի մշակման մասին

Ռուսաստանի և Ուկրաինայի համատեղ փաստաթղթի մշակման հարցում առաջխաղացում դեռ չկա, Կիևը չի պատասխանել Մոսկվայի առաջարկներին: Տեղեկությունը լրագրողներին է հայտնել ՌԴ նախագահի մամուլի քարտուղար Դմիտրի Պեսկովը։

Ավելի վաղ նա ասել էր, որ Ռուսաստանի և Ուկրաինայի միջև բանակցային գործընթացը բավական պասիվ ու անարդյունավետ է ընթանում առանց միջնորդների։

«Մեր պայմանները քաջ հայտնի են, դրանք հստակ ձևակերպված են թղթի վրա։ Այդ ամենը փոխանցվել է ուկրաինական կողմին, պատասխան չկա», - նշել է ՌԴ նախագահի մամուլի քարտուղարը։

Մեկնաբանելով Մարիուպոլում տիրող իրավիճակը՝ Պեսկովը հայտնել է, որ ռուսական կողմը հիմք է ընդունում նախագահի ասածը, որը վերաբերում է բոլոր քաղաքացիական անձանց՝ գործարանի տարածքը իրենց ընտրությամբ լքելու հնարավորությանը, ինչն էլ իրականացվել է:

«Իսկ ինչ վերաբերում է զինվորականներին, ապա ասվել է, որ նրանք նույնպես կարող են դուրս գալ՝ վայր դնելով զենքը։ Նրանց պատշաճ վերաբերմունք կցուցաբերվի, բոլոր վիրավորներն անհրաժեշտ բուժօգնություն կստանան։ Նախագահի խոսքը գերագույն գլխավոր հրամանատարի հրաման է», - ասել է Պեսկովը։