Սա արդեն երկրորդ խոշոր վթարն է 4 տարվա մեջ․ Բնապահպանության և ընդերքի տեսչական մարմինը տեղեկություն է հայտնում

ՀՀ բնապահպանության և ընդերքի տեսչական մարմինը տեղեկացնում է, որ 2022 թվականի ապրիլի 15-ին, ժամը 8:45-ի սահմաններում «Զանգեզուրի պղնձամոլիբդենային կոմբինատ» ՓԲԸ-ին պատկանող պոչատարում՝ 4-րդ դյուկեր (Քաջարան-Արծվանիկի պոչամբար) տեղի է ունեցել խողովակի վթար։

«Բնապահպանության և ընդերքի տեսչական մարմնի Սյունիքի տարածքային բաժնի աշխատակիցներն անմիջապես մեկնել են դեպքի վայր։ Ըստ նախնական տեղեկատվության վթարի հետևանքով պոչանքի արտահոսքը լցվել է վթարային իրավիճակների համար նախատեսված ավազան։

Հարուցված վարչական վարույթի շրջանակներում ձեռնարկվում են միջոցներ շրջակա միջավայրին հասցված հնարավոր վնասի և վթարի պատճառները պարզելու համար»։

Կանաչ Հայաստան ՀԿ-ն հիշեցնում է, որ սա արդեն երկրորդ խոշոր վթարն է 4 տարվա մեջ, նախորդ վթարը տեղի է ունեցել ԶՊՄԿ-ում 2019 թվականի հոկտեմբերի 17-ին, ՀՀ Գլխավոր դատախազությունում հարուցվեց քրեական գործ, սակայն մինչ օրս ոչինչ հայտնի չէ այդ քրեական գործի ճակատագրի վերաբերյալ։

Հիշեցնենք, որ այս նոր վթարի վերաբերյալ օրերս AURORANEWS -ը հրապարակում էր կատարել։ 

Տեսչության պատասխան նամակում չի ակնարկվում քրեական գործ հարուցելու մասին, հիշատակվում է միայն վարչական վարույթ եզրույթը։