71 տոկոսը կարծում է` ԱՄՆ-ն «սխալ ուղղությամբ է շարժվում». Ամերիկացիները` Բայդենի աշխատանքի մասին

Նախագահ Ջո Բայդենի աշխատանքի հավանության վարկանիշը շարունակում է ընկնել. ամերիկացիների միայն 40 տոկոսն է հավանություն տալիս նրա կատարած աշխատանքին, վկայում են NBC News-ի հարցման արդյունքները: Սա ամենացածր վարկանիշն է Բայդենի նախագահության ամբողջ ընթացքում։

Ամերիկացիների ճնշող մեծամասնությունը կարծում է, որ ԱՄՆ-ն սխալ ուղղությամբ է շարժվում։

Հարցման մասնակիցների ընդհանուր 71 տոկոսն ասել է, որ կարծում է, որ երկիրը «սխալ ուղղությամբ է շարժվում»:

«Այս հարցումը վկայում է այն մասին, որ նախագահ Բայդենին եւ դեմոկրատներին աղետալի ընտրություններ են սպասվում»,- NBC News-ին ասել է Public Opinions Strategy-ից հանրապետական ​​սոցիոլոգ Բիլ Մաքինտուրֆը, ով հարցումն անցկացրել է Hart Research Associates-ից դեմոկրատ Ջեֆ Հորվիթի հետ:

Հարցմանը մասնակցել է 1000 չափահաս, որոնցից 790-ը գրանցված ընտրողներ են եղել:

Գործող նախագահների քաղաքական կուսակցությունը հակված է միջանկյալ ընտրությունների արդյունքում կորցնել տեղերը թե՛ Ներկայացուցիչների պալատում, թե՛ Սենատում: 2022 թվականի նոյեմբերի ընտրություններում վտանգված է 435 տեղը Ներկայացուցիչների պալատում եւ 35 տեղը Սենատում:

Դեմոկրատները Ներկայացուցիչների պալատում 12 ձայնով նեղ մեծամասնություն ունեն։ Դեմոկրատները վերահսկում են Սենատը միայն փոխնախագահ Քամալա Հարիսի վճռական քվեարկության շնորհիվ։