Մենք կարող ենք փոխզիջման տարբերակներ գտնել. Զելենսկին` բանակցությունների մասին

 Ուկրաինայի նախագահ Վլադիմիր Զելենսկին հայտարարել է Ղրիմի և Դոնբասի հանրապետությունների ճանաչման հարցը քննարկելու և այդ տարածքներում մարդկանց հետագա բնակության վերաբերյալ փոխզիջման տարբերակներ գտնելու հնարավորության մասին: Այս մասին նա ասել է ամերիկյան ABC հեռուստաալիքին տված հարցազրույցում։

Զելենսկուն հարց են ուղղել, թե հնարավոր է արդյոք Ղրիմի ճանաչումը որպես Ռուսաստանի մաս, իսկ ԴԺՀ–ն ու ԼԺՀ-ն՝ անկախ հանրապետություններ։

«Ժողովուրդը, որն ինձ ընտրել է, պատրաստ չէ կապիտուլյացիայի, մենք պատրաստ չենք ուլտիմատումների։ Բայց մենք կարող ենք Ռուսաստանի հետ քննարկումներ ունենալ Ղրիմի և Դոնբասի ապագայի վերաբերյալ։ Կարծում եմ, որ մենք կարող ենք քննարկել հարցեր, որոնք վերաբերում են ժամանակավորապես օկուպացված տարածքներին և չճանաչված հանրապետություններին, որոնք ոչ ոք չի ճանաչել Ռուսաստանից բացի, մենք կարող ենք փոխզիջման տարբերակներ գտնել այդ տարածքների հետագա ճակատագրի հետ կապված։

Ինձ համար ամենակարևորն այն է, թե ինչպես են ապրելու այդ տարածքներում մարդիկ, ովքեր ցանկանում են լինել Ուկրաինայի մի մասը։ Ո՞վ Ուկրաինայում կցանկանա ընդունել նրանց։ Այդ պատճառով հարցը շատ ավելի բարդ է, քան պարզապես ճանաչումը»,- հայտարարել է Զելենսկին։