«Անորակ հրթիռների» մասին դատական գործը կքննվի դռնփակ, սակայն ամբաստանյալները դեմ են դրան

Դատավոր Մանվել Շահվերդյանը որոշել է «անորակ հրթիռների» մասին դատական գործը քննել դռնփակ, սակայն ամբաստանյալները դեմ են դրան։ Այդ մասին հայտնեց ԶՈւ ավիացիայի նախկին պետ Ավետիք Մուրադյանի փաստաբան Երեմ Սարգսյանը։

Նա նշեց, որ դատախազությունն է պահանջել նիստը դռնփակ անցկացնել, սակայն բոլոր ամբաստանյալներն ու նրանց փաստաբանները դեմ են եղել դրան։ Ավելին` միջնորդել են կիսափակ ռեժիմով քննել գործը, սակայն դատարանը որոշել է մերժել միջնորդությունները և դատարանի դահլիճ չթողնել լրագրողներին ու հանրության ներկայացուցիչներին։ Փաստաբանը նկատեց, որ և՛ նախաքննական մարմինները, և՛ դատախազությունը, նաև որոշ պաշտոնյաններ հրապարակել են գործի մանրամասները, և այս իրավիճակում ավելորդ է խոսել գաղտնիության մասին։

Բայց այդ, փաստաբանները ենթադրում են, որ գործի մակագրումն իրականացվել է ոչ էլեկտրոնային տարբերակով։ Ըստ Սարգսյանի` գործը Շահվերդյանին է մակագրվել ընթացակարգի խախտմամբ, ոչ այբբենական հերթականությամբ, ինչպես նախատեսում է կարգը։

«Եթե մակագրումը իսկապես ձեռքով է կատարվել ու կարգի խախտմամբ, ապա միջնորդելու ենք, որ դատավորը ինքնաբացարկ ներկայացնի», – ասաց նա։

Հիշեցնենք` սեպտեմբերի 30-ին ԱԱԾ–ն հայտնել էր, որ Դավիթ Տոնոյանն ու զենքի մատակարարմամբ զբաղվող Դավիթ Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։