Արմեն Սարգսյանը 85 աշխատանքային օրից 54-ը Հայաստանում չի եղել, եղել է արտասահմանում. Աղվան Վարդանյան

2021 թվականի հուլիսի 1-ից մինչև հոկտեմբերի 31-ը 122 օր է, որից աշխատանքային՝ 85 օր: Այս 85 օրից 54-ը Հանրապետության նախագահն անցկացրել է ոչ Հայաստանում: Այս մասին խորհրդարանում քննարկման ժամանակ հայտարարեց «Հայաստան» խմբակցության պատգամավոր Աղվան Վարդանյանը և հավելեց, որ նախագահը պետական կարևոր ինստիտուտ է, իսկ այդ ինստիտուտի ծախսերի մոտ 25-30 տոկոսը կազմում են միայն արտասահմանյան գործուղումները.

«Որքանո՞վ է այդ ինստիտուտը իր գործառույթներով զբաղվում», - հետաքրքրվեց պատգամավորը:

Նախագահի աշխատակազմի ղեկավարի տեղակալ Խաչատուր Պողոսյանն էլ պարզաբանեց, որ նման վերլուծություն չունեն.«Ասել, թե արդյունավե՞տ է նախագահի՝ օրերս Գլազգո կատարած այցելության, կամ՝ դրանից առաջ Իտալիա այցի ծախսերի արդյունավետությունը, մենք վերլուծություն չուենք: Մենք ուղղակի փորձում ենք մեզ համար նախատեսված միջոցներով, ավելին չպահանջելով, կազմակերպել ՀՀ նախագահի բնականոն գործունեությունը»,-ասաց Խաչատուր Պողոսյանը: