Էստոնիայում մարդիկ դիմակներ կկրեն նաև շոգեբաղնիքում

Էստոնիայի կառավարությունը նոր հակահամաճարակային սահմանափակումներ է մտցրել, որոնք վերաբերվում են փակ տարածքներում դիմակներ կրելուն: Ինչպես հայտնում է Sputnik Meedia-ն՝  փակ տարածքներում դիմակներ կրելու պարտավորությունը տարածվում է ամենուր՝ վերահսկվող բոլոր գործողությունների դեպքում:

Այս պահանջին կենթարկվեն 12 տարեկանից բարձր բոլոր մարդիկ: Նոր փոփոխությունն ուժի մեջ կմտնի արդեն հոկտեմբերի 29-ից:
 

Նշվում են նաև այն վայրերը, որտեղ դիմակ կրելը պարտադիր է. թատրոններ, թանգարաններ, համերգասրահներ, ցուցահանդեսներ, կինոթատրոններ, հանրային սննդի վայրեր, սպորտի, մարզումների, մրցումների հասարակական վայրեր, ինչպես նաև շոգեբաղնիքներ, սպա սրահներ, լողավազաններ և ջրաշխարհներ:

Միևնույն ժամանակ, երկրի կառավարությունն ընդգծել է, որ դիմակ, իհարկե, չի կարելի օգտագործել մարզումների ժամանակ, ջրի հետ շփվելիս կամ ռեստորանում սնվելիս։ 
 

Այն դեպքում, երբ մարդուն առողջական նկատառումներով հակացուցված է դիմակ կրելը, անհրաժեշտ է դա հաստատել համապատասխան բժշկական տեղեկանքով։