Արցախի հարցը Ադրբեջանի համար պրեստիժի հարց էր, Սյունիքինը ստրատեգիական մեծ նշանակություն ունեցող հարց է բոլորի համար

Ես կարծում եմ, որ այս այցը նախընտրական չէր, այլ կապված էր Սյունիքի մասով որոշ փոփոխությունների հետ, որոնք ինքը չի հասցրել անել հօգուտ Ադրբեջանի։ Այս մասին քիչ առաջ լրագրողների հետ զրույցում ասաց ՀՓՇ վարչապետի թեկնածու Վազգեն Մանուկյանը։

«Ինքը ժողովրդին վախեցնում էր պատերազմով, իմ կարծիքով՝ ինքը պատերազմը չկանգնեցրեց, որպեսզի ժողովրդի մոտ վախ առաջանա պատերազմի նկատմամբ։ Ինչ լինում է, ասում է՝ պատերազմ կլինի, վախեցնում է։ Քանի դեռ ինքը Հայաստանի ղեկավարն է, Հայաստանը ապագա չունի։ Պետք է անպայման քշենք նրան, ոչ էլ ներկա ունենք։ Ես կարծում եմ՝ կան հարցեր, որոնք Ադրբեջանը մինչեւ վերջ չի լուծել, իսկ այցը դրա հետ էր կապված։ Ստրատեգիական տեսակետից եթե Արցախի տարածքները վերցնելը Ադրբեջանի համար պրեստիժի հարց էր, ապա Սյունիքի հարցը ստրատեգիական մեծ նշանակություն ունեցող հարց է։ Հարևաններին նույնպես Սյունիքի հարցը ավելի շատ է հետաքրքիր, քան Արցախի հարցը։ Պարսիկներին, չինացիներին, բոլորին այս հարցը ավելի է հուզում»,- ասաց Մանուկյանը