Ես կեղծ մամուլ չեմ նայում. Վլադիմիր Կարապետյանը՝ «Эхо Москвы» լրագրողի հետ սկանդալային զրույցի մասին
Համացանցում լուրեր են տարածվում, որ այսօր Երևանի սրճարաններից մեկում Նիկոլ Փաշինյանի նախկին խոսնակ Վլադիմիր Կարապետյանը հանդիպել է «Эхо Москвы» լրատվամիջոցի թղթակից Իրինա Բաբլոյանի հետ:
Ըստ հրապարակումների՝ Վլադիմիր Կարապետյանը լրագրողի հետ սկանդալային զրույցի ընթացքում պատմել է իր ու Ադրբեջանի դեսպանի շփումների մասին։
«Ես Ադրբեջանի դեսպանին ասացի. «Դուք ինչ ուզում էիք, մենք տվեցինք, հիմա ձեր հերթն է մեզ օգնելու»,-ասել է Կարապետյանը։ Նա նշել է, որ հիմա Փաշինյանի գլխավոր խնդիրը գերիներին վերադարձնել չկարողանալն է, ինչն ընդդիմության ձեռքին լուրջ գործիք է դարձել։ «Ես Ադրբեջանի դեսպանին ասացի, որ գերիների վերադարձը պետք է ներկայացնել ոչ թե որպես ռուսական միջնորդության, այլ Փաշինյանի աշխատանքի արդյունք։ Եթե իսկապես շահագրգռված եք, որպեսզի Հայաստան-Ադրբեջան-Թուրքիա ուղիղ կապ հաստատվի՝ առանց ռուսական միջնորդության, ապա դրա առաջին քայլը գերիներին վերադարձնելն է։ Առաջարկեցի գոնե 5 հոգի այս փուլում այդ ֆորմատում տան, բայց այդ «օլուխները» տեղից չեն շարժվում»,-ասել է Կարապետյանը։
Վլադիմիր Կարապետյանը զրուցակից կնոջը հարցրել է, թե իր հետ ի՞նչ ԶԼՄ-ներ են եղել նույն ինքնաթիռում, վերջինս պատասխանել է՝ «Коммерсантъ», «Дождь»։
Auroranews-ի հարցին, թե տեսել է արդյոք մամուլի հրապարակումնները իր անվան շուրջ Կարապետյանն ասաց.
«Ես կեղծ մամուլ չեմ նայում»:
Դիտարկմանը, թե կա հրապարակված լուսանկար Կարապետյանն արձագանքեց. «Ես արդեն ասացի»:
