Պարոն Պետրոսյանը հայտարարել է, որ ինչ - որ չակերտներ պետք է բացի, ուրեմն թող բացի, մենք էլ կիմանանք, թե ո՞րն էր խմբակցությունը լքելու նրա որոշման պատճառը, ԲՀԿ-ում բոլորն ապշած են. Արման Աբովյան

ԱԺ պատգամավոր Գեւորգ Պետրոսյանի՝ ԲՀԿ խմբակցությունից դուրս գալու որոշումն անսպասելի է եղել ԲՀԿ-ի համար,- «Փաստինֆո»-ի հետ զրույցում ասել է ԲՀԿ խմբակցության քարտուղար Արման Աբովյանը՝ նշելով, որ ԲՀԿ-ում բոլորն ապշած են։

«ԲՀԿ-ում բոլորն ապշած են՝ ինչո՞ւ Գևորգ Պետրոսյանն այսքան անսպասելիորեն, հանկարծ, որոշեց լքել խմբակցությունը, մանավանդ, որ կուսակցության ղեկավար Գագիկ Ծառուկյանն առանձնահատուկ ջերմ և հարգալից վերաբերմունք ուներ նրա նկատմամբ, նույնիսկ զուտ մարդկային հարաբերություններում: Գագիկ Ծառուկյանը միշտ էլ առանձնացրել է պարոն Պետրոսյանին,- «Փաստինֆո»-ի հետ զրույցում ասել է Ա.Աբովյանը եւ ավելացրել. «Ի՞նչ ասեմ… Պարոն Պետրոսյանը հայտարարել է, որ ինչ - որ չակերտներ պետք է բացի, ուրեմն թող բացի, մենք էլ կուսակցության ներսում կիմանանք, թե որն էր խմբակցությունը լքելու նրա կայացրած որոշման պատճառը»։

Հիշեցնենք, որ այսօր Գ.Պետրոսյանը հայտարարել է, որ անընդունելի է համարում հստակ քայլեր կատարելու հարցերում հապաղումը ու նպատակահարմար չի գտնում «Բարգավաճ Հայաստան» խմբակցության կազմում իր գործունեությունը՝ նշելով, որ ԱԺ-ում կշարունակի իր գործունեությունը որպես անկախ պատգամավոր՝ չնայած երկու օր առաջ Գ.Պետրոսյանը «Փաստինֆո»-ի հետ զրույցում հերքել էր խմբակցությունից դուրս գալու տեղեկությունները։

«Որևէ խնդիր կամ տարաձայնություն պարոն Գևորգյանը ո´չ խմբակցության ներսում, ո´չ ղեկավարության հետ չի ունեցել, նորից եմ կրկնում՝ հարաբերությունները նույնիսկ շատ ջերմ ու բարիդրացիական են եղել»,- վստահեցրեց Ա.Աբովյանը:

Հարցին՝ ինչպե՞ս է հնարավոր այդօրինակ բարիդրացիական ու ջերմ հարաբերությունների պարագայում, անխոս ու լուռ լքել խմբակցության շարքերը,՝ Արման Աբովյանը նշեց, թե ոչինչ ասել չի կարողանում՝ ԲՀԿ-ում բոլորն ապշած են ու սպասում են բացատրության:

Նկատառմանը, թե, ըստ մամուլում համառորեն շրջանառվող լուրերի, խմբակցությունը հաջորդը լքող պատգամավորը Նաիրա Զոհրաբանն է լինելու, Արման Աբովյանը կտրականապես հերքեց՝ ներսում նման որևէ խոսակցություն չկա: Հնարավո՞ր է արդյո՞ք Նաիրա Զոհրաբյանն էլ, իր նախկին գործընկերոջ նման՝ թիմակիցների համար լուռ և անսպասելի հեռանալու որոշում կայացնի, կրկին անգամ անակնկալի բերելով խմբակցության անդամներին, Արման Աբովյանը հավանական չհամարեց: