Օտարերկրացիների կողմից երեխաների ապօրինի որդեգրման գործով մեղադրյալ Արշակ Ջերջերյանը գրավի դիմաց ազատ է արձակվել
Վերարտադրողական առողջության պերինատոլոգիայի, մանկաբարձության եւ գինեկոլոգիայի հանրապետական ինստիտուտի» փոխտնօրեն Արշակ Ջերջերյանն, ով անցնում է օտարերկրացիների կողմից երեխաների ապօրինի որդեգրման գործով, 5մլն դրամ գրավի դիմաց ազատ է արձակվել:
Այս մասին «Հետք»-ի հարցին ի պատասխան հայտնեցին դատախազության հանրային կապերի բաժնից:
Նշենք, որ ավելի վաղ «Հետք»-ը գրել էր գործով մյուս երեք մեղադրյալների՝ Անուշ Գարսանցյանի, Լիանա Կարապետյանի նկատմամբ գրավ կիրառելու, ինչպես նաև «Վերարտադրողական առողջության պերինատոլոգիայի, մանկաբարձության եւ գինեկոլոգիայի հանրապետական ինստիտուտի» տնօրեն Ռազմիկ Աբրահամյանին կալանավորելու միջնորդությունը մերժելու դատարանների որոշումների մասին:
Վերջիներս, ինչպես նաև Արշակ Ջերջերյանը ձերբակալվել էին դեկտեմբերի 19-ին, ապա միջնորդություններ էին ներկայացվել դատարան՝ նրանց կալանավորելու վերբերյալ:
Ստացվում է, որ թեև վարույթն իրականացնող Քննչական կոմիտեն վերը նշված չորս մեղադրյալներին կալանավորելու հիմքեր և պայմաններ է տեսել՝ նրանց ոչ ոք չի կալանավորվել:
Ջերջերյանի, Աբրահամյանի, Կարապետյանի և Գարսանցյանի մասնակցությամբ գործը հարուցվել է ԱԱԾ-ում՝ խնամքը ստանձնելու նպատակով երեխայի առքի կամ ստանձնողի խնամքին հանձնելու նպատակով երեխայի վաճառքի, որդեգրման գաղտնիքը հրապարակելու, որդեգրման համաձայնություն տալուն հակելու, առևտրային կաշառք տալու, առևտրային կամ այլ կազմակերպությունների ծառայողների կողմից լիազորությունները չարաշահելու, պաշտոնեական լիազորություններն անցնելու դեպքերի առթիվ, ապա դրա վարույթը փոխանցվել է Քննչական կոմիտե:
