Աղբամանների տենդերը շահել է Քաղաքապետարանի կոմունալ վարչության պետի քրոջ որդին. Խաժակյանի նոր բացահայտումները
Երևանի ավագանու «Լույս» խմբակցության ղեկավար Դավիթ Խաժակյանը ֆեյսբուքյան ուղիղ հեռարձակմամբ խոսել է քաղաքապետարանի գնունմների գործընթացում հայտնաբերած կոռուպցիոն ռիսկի մասին։
Խաժակյանը նշել է, որ աղբամանների համար հայտարարված տենդերում հաղթող է ճանաչվել Երևանի քաղաքապետարանի կոմունալ վարչության պետ Արարատ Խաչիկյանի հարազատ քրոջ որդուն պատկանող ընկերությանը։ Խոսքը 180 միլիոն արժողությամբ տենդերի մասին է։
«Մայիսի 29-ին Քաղաքապետարանում տեղի է ունեցել գնման ընթացակարգի հանձնաժողովի նիստը աղբամանների վերաբերյալ, որը նախագահում էր կոմունալ վարչության պետը: Պարզվել է, որ մասնակիցը ով հաղթել` այդ տենդերը հանդիսանում է պարոն Խաչիկյանի հարազատ քրոջ որդին: Սրա շարունակությունը շատ ավելի զարհուրելի է: Սեպտեմբերից 25-ին պարոն Խաչիկյանը ստորագրել է հայտարարություն շահերի բախման բացակայության մասին: Օրենքը պարտադրում է, երբ բացահայտվում է շահերի բախումը, պետք է տվյալ հանձնաժողովի անդամը չմասնակցի նիստերին, որովհետև անկողմնակալ չէ: Տեսեք ինչ է ստացվում: Բացել են հայտերը և տեսել են, որ երեք կազմակերպություններ են մասնակցել աղբամանների մրցույթին: «Գավառ տրանս» ՍՊԸ-ն, որը մասնակցել է մրցույթին ու առաջարկել ամենանվազ գինը` 176 մլն դրամ 1000 աղբամանի համար, հաղթող չի ճանաչվել: Ինքնաբերաբար հաղթող է ճանաչվել պարոն Խաչիկյանի քրոջ որդու նոր ստեղծված ՍՊԸ-ն»,- հայտարարեց Դավիթ Խաժակյանը: «Գավառ տրանս» ՍՊԸ-ն դիմել է գնումները բողոքարկող խորհրդին, որի պատասխանը դեռ հայտնի չէ:
