Գրավե՞լ եք ամբիոնը․ Արարատ Միրզոյանը՝ պատգամավորին
Այսօր Ազգային ժողովում ԲՀԿ-ական պատգամավոր Տիգրան Ուրիխանյանի ելույթից հետո, վերջինս և Աժ նախագահ Արարատ Միրզոյանը վիճեցին։ Մինչ պատգամավորը քննադատում էր քաղաքապետին, մի քանի անգամ հնչեց ելույթի ժամանակի ավարտն ազդարարող զանգը:
«Գրավե՞լ եք ամբիոնը: Կոչնակը նրա համար ա հնչում, որ ժամային սահմանափակումը հաշվի առնենք», - ասաց Միրզոյանը։
Անդրադառնալով Ուրիխանյանի կողմից Երևանի քաղաքապետի աշխատանքի քննադատություններին՝ Միրզոյանը նշեց. «Չեմ հասկանում, ձեր պատկերացրած քաղաքապետը գնում ա հանդիպմանը, անընդհատ դիմացինը խոսում է հեռախոսով, հետո հելնում գնում է, նորից գալիս է»։
Ուրիխանյանն էլ արձագանքեց, որ իր իրավունքն է ԱԺ ամբիոնից խոսել իրեն հուզող հարցերի մասին:
«Իմ իրավունք էլ սա է, ես էլ իմ իրավունք եմ իրացնում», - արձագանքեց Միրզոյանը:
Հիշեցնենք՝ երեկ ԲՀԿ առաջնորդ Գագիկ Ծառուկյանը հայտարարել էր, որ Աբու Դաբիի թագաժառանգն ու «Ռոտանա» հյուրանոցային ցանցի տերը Երևանի քաղաքապետի հետ կես ժամ հանդիպումից հետո հիասթափված հեռացել են:
Երեկ, անդրադառնալով թեմային, քաղաքապետ Հայկ Մարությանը նշել էր, որ վերջիններս սպորտային հագուստով էին ներկայացել իր հետ հանդիպմանն ու ընթացքում անընդհատ պատասխանել են հեռախոսազանգերի:
