Արցախում ու Հայաստանում շշուկներ են գնում եւ ասում են՝ բա որ Վիտալի Բալասանյանն ընտրվի Արցախի նախագահ, ինքը կոշտ դիրքորոշում ունի ՀՀ իշխանության, Նիկոլ Փաշինյանի դեմ: Այս մասին այսօր Արցախի «Արդարություն» կուսակցության արտահերթ համագումարում հայտարարեց Արցախի հերոս գեներալ Վիտալի Բալասանյանը:

«Իհարկե, կան տարակարծություններ, բայց ես որեւէ անհատի հետ անձնական որեւէ խնդիր չունեմ, մանավանդ Նիկոլ Փաշինյանի հետ: Մենք իրար ճանաչում ենք մոտ 25 տարի: Ես դեմ եմ իր կուրսին, ես երեւույթներին եմ գնահատական տալիս»,-հայտարարեց Բալասանյանը:

Նա անդրադարձավ նաեւ հայտարարություններին, թե Արցախը Հայաստանի մարզ է. «Ես միշտ պնդել եմ եւ պնդում եմ, որ Արցախը մարզ չէ: Այո, ասել եմ, որ նրանք, որոնք կփորձեն… ոտք չդնեն Արցախի տարածք: Մենք ունենք 12 հազար կմ տարածք՝ Արցախը, որը 90 տոկոսից ավելիով արցախահայության ձեռքբերումն է, մնացած 10 տոկոսը մեր հայրենակիցների մասնակցությունն է»:

Նա անդրադարձավ նաեւ ընտրությունների գաղտնիությանը. «Մենք չպետք է թույլ տանք, որ ինչ-որ մեկը կաշկանդված լինի: Ինչու պետք է իմ կինն իմանա, թե ում եմ ձայն տալու կամ ում եմ ձայն տվել, որ ինքն էլ քրոջն ասի, քուրն էլ նախագահականում մեկին խաբար տա: Բայց մարդիկ կան, որ դեռ մեկ տարի առաջ հայտարարում են, թե ձայն ենք տալու այսինչին: Մի բարձրաձայնեք, որ որեւէ մեկի կողմից հետապնդման չենթարկվեք»: