10 մլն դրամ վճարած և մեկ ամիս ծառայած քաղաքացիները պետք է ստանան զինգրքույկ. Հայկ Սարգսյան

«Արագացված զինվորական ծառայության մասին» օրենքի նախագիծը ՀՀ ԱԺ «Իմ քայլը» խմբակցության պատգամավոր Հայկ Սարգսյանը առաջարկել է, որպեսզի զինծառայությունից խուսափոց քաղաքացիները չխուսափեն Հայաստան վերադառնալ: 

«Ես առաջարկում եմ մեր քաղաքացիներին վերադառնալ հայրենիք ավելի վաղ, քան կլրանա նրանց 27 տարեկանը, և վճարել 10 մլն դրամ ու ծառայել արագացված ընթացակարգով», - ասաց Սարգսյանը:

Լրագրողների հարցին, թե չի՞ կարծում, որ 10 մլն դրամ վճարելով արագացված զինծառայություն անցնելու իր առաջարկն առավելապես հնարավորություն է ունևորների համար, քանի որ նրանք գումարը կտան, իրենց տղաներին կազատեն բանակից:

Սարգսյանն ասաց, որ իր առաջարկած նախագծի առնչությամբ այս հարցը շատերին է հետաքրքրել:

«Ես օրենքի նախագիծը շրջանառության մեջ դնելուց առաջ մեկնաբանությունների բովանդակությունը պատկերացնում էի, անգամ գիտեի՝ ինչ տառատեսակով են այդ քոմենթները գրվելու և ով է գրելու»,- ասաց նա:

Աարցին, թե արդյոք մեկ ամիս ծառայած քաղաքացիներն էլ են ստանալու զինգրքույկ՝ Սարգսյանն ասաց. «Այո, պետք է ստանան»: