Վանեցյանը, նույնիսկ հարցի չպատասխանելով, երկրի անվտանգությանը վնասում է․ Քոչարյան

«Երբ հրաժարականից հետո Արթուր Վանեցյանն սկսեց շատ հակասական ելույթներ ունենալ, ես ընդամենը հիշեցրեցի, որ նման կառույցների ղեկավարները, որպես կանոն, աննկատ են հեռանում»,- ԱԺ-ում լրագրողների հետ զրույցում նշեց ԱԺ Ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:

«Այդպիսի մարդիկ իրենք պաշտոնավարման ընթացքում առնչվում են միայն գաղտնիության հետ: Առեղծվածներ ոչ մեկն իրավունք չունի ստեղծել, որովհետեւ դա այն պաշտոնն է, որ նույնիսկ չպատասխանելով՝ ինքը երկրի անվտանգությանը վնասում է, երբ ասում է՝ ես չեմ պատասխանի»,-ասաց Անդրանիկ Քոչարյանը՝ հավելելով, որ հարցը հենց նրա համար է տրվում, որ ստեղծեն կասկածամտություն։

 «Արժեր, որ պարոն Վանեցյանը գիտակցեր, թե ինչ կարեւոր պաշտոն է զբաղեցրել: Ես չեմ հիշում, որ մեր երկրում այդ պաշտոնը զբաղեցրած որեւէ մեկը իր պաշտոնավարումը  թողնելուց հետո այսքան ակտիվ քաղաքական կյանքի մեջ հայտնվեր: Նա պետք է գիտակցեր, որ պաշտոնը թողնելուց հետո անգամ ինքը հանդիսանում է անվտանգության համակարգի պաշտպան: Եթե չի գիտակցել, դա կարող է ծանր հետեւանքներ ունենալ»,- ասաց Անդրանիկ Քոչարյանը։