Վերին Լարսի կուտակումների պատճառը բեռների նախատեսվածից ավել քաշերն են. Մելքումյան

Վերին Լարսում կուտակումները որոշ չափով թուլանում են: Այս մասին Tert.am-ի հետ զրույցում ասել է ԱԺ «Բարգավաճ Հայաստան» խմբակցության պատգամավոր Միքայել Մելքումյանը:

Մելքումյանի խոսքով` կուտակումների հիմնական պատճառը բեռների նախատեսվածից ավել քաշերն են, որոնք, բացի կուտակումներ առաջացնելուց, նաև տուգանք են ստանում:

«Ես երեկվանից անմիջական կապի մեջ եմ Վերին Լարսի տնտեսվարող ոլորտի գործընկերների հետ:  Վերջին տեղեկությունը, որ ստացա մի քանի ժամ առաջ, այն էր, որ արդեն 150 մեքենա թողել են, որ անցնի»,- ասել է Մելքումյանը:

«Երբ բեռնատարները սռնիում ցորենը բեռնած գալիս են, տարբեր քաղաքներ անցնելով հասնում են Վերին Լարսի մաքսային անցակետման հատված, և պարզվում է, որ բեռները սահմանվածից ավելի ծանր քաշ ունեն որոնք չեն համապատասխանում նախատեսվածին, ինչը խախտում է համարվում, և մոտ 100 հազար ռուբլի տուգանք է հասնում ներկրողին», - ասել է Մելքումյանը:

Մելքումյանը նաև հավելել է, որ տարբեր քաղաքներով անցնելիս ստուգվում է բեռի քաշը, և հասնելով Վերին Լարսի անցակետի ստուգման բաժին, էական տարբերությունն է երևում: Մյուս քաղաքների կշեռքների և Լարսի կշեռքների ճշգրտության միջև տարբերություն կա:

Մելքումյանի խոսքով՝ այն 150 մեքենաները, որոնք անցել են անցակետը, մեծ հավանականությամբ տուգանվելուց հետո են անցել: Նշեց նաև, որ այն ներկրողները, ովքեր աշխատել են էլեկտրոնային բանկային փոխանցման միջոցով, ավելի քիչ խնդիրների են բախվել, քան նրանք, ովքեր հաշիվ-ապրանքագրերը ձեռագրով են ներկայացրել, որը ևս տուգանքի վտանգի առաջ է կանգնեցրել: