ՏԵՍԱՆՅՈՒԹ․ Արամ Հարությունյանը բերման ենթարկվեց
Իրենք ուզում են փակեն Քոչարյանին, Սեյրան Օհանյանին, Խաչատուրովին, բոլորին, դրա համար մենք այսօր չպիտի նայենք, ես ոտքով կճխլեմ Նիկոլին էլ, Լևոնի զոմբիներին էլ, ոստիկաններին այսօր որպես քավության նոխազ են օգտագործում: Այս մասին Երևանի իրավասության դատարանի Շենգավիթ նստավայրում լրագրողների հետ զրույցում ասաց «Ազգային համաձայնություն» կուսակցության նախագահ Արամ Հարությունյանը Քոչարյանի և մյուսների գործով դատական նիստից հետո:
Նկատենք, որ նիստի ավարտից հետո իրավիճակը դատարանի բակում լարված էր։
Քոչարյանի աջակիցներին, այդ թվում և Արամ Հարությունյանին ոստիկանությունը բերման ենթարկեց: Քաղաքացիներից մեկի ինքնազգացողությունն էլ վատացավ, և նրան շտապօգնության մեքենայով տեղափոխեցին հիվանդանոց։
Արամ Հարությունյանը նշեց, որ միջադեպ է եղել մի կնոջ հետ, քանի որ այդ կինը վիրավորել է իրեն՝ անվանել թուրք ու անիծելով իր երեխային: «Այսօր Լևոն Տեր-Պետրոսյանի կռիվն է Ռոբերտ Քոչարյանի հետ: Այսօր մեջտեղ են եկել այն մարդիկ, ովքեր հող էին հանձնում: Իսկ այդ կինն ինձ ասել է թուրք, ես հարվածել եմ նրան՝ ՀՀՇ-ի ԲՏՌ-ներին՝ Նիկոլի և Լևոնի հենարաններին»,-լրագրողներին միջադեպն այսպես ներկայացրել Հարությունյանը, ում ոստիկաններն այդ ընթացքում տեղափոխում էին դեպի մեքենա:
Հիշեցնենք, որ Երևանի ընդհանուր իրավասության դատարանում (Շենգավիթի նստավայր) ՀՀ երկրորդ նախագահ Ռոբերտ Քոչարյանի և մյուսների գործով ընթացող դատական նիստում Ռ․ Քոչարյանի պաշտպանական խումբը միջնորդել էր վերացնել նախագահի խափանման միջոց կալանքը։ Փաստաբաններ Արամ Օրբելյանը և Արամ Վարդևանյանը, հղում անելով Սահմանադրական դատարանի ս․թ․ սեպտեմբերի 4-ին կայացրած որոշմանը, ընդգծել էին, որ Ռ․ Քոչարյանի կալանքը հիմնավոր չէ։
Հիշեցնենք, որ սեպտեմբերի 7-ին Ռ․ Քոչարյանի փաստաբանական թիմը միջնորդել էր անհապաղ վերացնել նախագահի խափանման միջոց կալանքը և դադարեցնել նրա նկատմամբ քրեական հետապնդումը։ Ամիսներ առաջ պաշտպանները ներկայացրել են նաև գրավի կիրառման վերաբերյալ միջնորդությունը, որը մինչ օրս այդպես էլ քննության չի առնվել։
Տեսանյութը News.am-ի։
