Էջմիածնում «խելացի կանգառներ» կտեղադրվեն

Էջմիածնի քաղաքապետ Դիանա Գասպարյանը գրառում է կատարել իր ֆեյսբուքյան էջում, որում հայտնում է, որ Էջմիածնում նախատեսվում է ունենալ «խելացի կանգառներ»:

«Կանգառները հագեցած են լինելու հետևյալ հնարավորություններով.

Օդափոխություն (ձմռանը տաքացվող, ամռանը սառեցվող համակարգեր),
Էլեկտրոնային սարքերի լիցքավորում,
Անվճար Wi-Fi,
Տեղեկատվություն հասարակական նշանակության վայրերի վերաբերյալ,
Տեղեկատվություն երթուղայինների ժամանման վերաբերյալ,
Անհրաժեշտ տեղեկություններ զբոսաշրջիկների համար,
Վենդորային սարքեր սուրճի և քաղցրեղենի համար,
Գովազդ,
Ստենդ անվճար հայտարարությունների համար,
Աղբի տեսակավորման համար նախատեսված աղբամաններ:

Ծրագրով նախատեսվում է կառուցել 6-8 այդպիսի կանգառ առաջիկա մեկ տարվա ընթացքում: Առաջին կանգառի կառուցումն արդեն մեկնարկել է, և այն կտեղադրվի մեկ ամսից:

Ցանկանում եմ նաև տեղեկացնել, որ «խելացի կանգառների» նախաձեռնությունը եղել է քաղաքապետարանի կողմից, և մասնավոր հատվածի ընկերությունների հետ բանակցությունների արդյունքում որոշվել է, որ քաղաքային բյուջեից որևէ գումար դրանց կառուցման համար չի հատկացվելու: Այսինքն՝ քաղաքապետարանը երկարաժամկետ պայմանագրով հատկացնելու է միայն տարածքը, իսկ կառուցման ծախսերը հոգալու է մասնավոր ընկերությունը»,- տեղեկացրել է Գասպարյանը: