Երբ քաղաքապետարանի կողմից կլինի ֆինանսավորումը, «Սանիթեքը» ևս կվերականգնի աշխատանքները. ընկերության խոսնակ
Այն պահին, երբ կլինի պարտավորությունների կատարում քաղաքապետարանի կողմից, «Սանիթեքը» ևս կվերականգնի աշխատանքները: Այս մասին Tert.am-ի հետ զրույցում ասաց «Սանիթեք»-ի հասարակայնության հետ կապերի պատասխանատու Քնարիկ Առաքելյանը:
«Մեր վերջին հրապարակած բաց նամակում նշել էինք, որ այն պահին, երբ կլինի պարտավորությունների կատարում քաղաքապետարանի կողմից, «Սանիթեքը» ևս կվերականգնի աշխատանքները: Այս պահին ֆինանսական վիճակը թույլ չի տալիս աղբահանություն իրականացնել»,- ասաց Առաքելյանը:
Հիշեցնենք, որ «Սանիթեք» ընկերությունն արդեն 5-րդ օրն է` Երևանում աղբահանություն չի իրականացնում՝ նշելով, որ Երևանի քաղաքապետարանն իրենց չի վճարել ավելի քան 330 միլիոն դրամ:
«Ամեն ինչ պաշտոնական կերպով մենք ներկայացրել ենք: Ծանոթացեք կիրակի օրվա մեր հայտարարությանը, այնտեղ սպառիչ կերպով ամեն ինչ կա: Փոխադարձ մեղադրանքների մասին ասեմ, գիտեմ, թե «Սանիթեք»-ը ինչ հայտարարություններ է անում, համենայն դեպս քաղաքապետարանը շատ հստակ, պարզ կերպով ներկայացնում է դիրքորոշումը, անելիքները, ստեղծված իրավիճակի պատճառները և դուրս գալու եղանակները»,- Tert.am-ի հետ զրույցում, անդրադառնալով «Սանիթեք»-ի աշխատանքները չկատարելու հարցին, նշեց Երևանի քաղաքապետի մամուլի քարտուղար Հակոբ Կարապետյանը:
Ավելի վաղ Հակոբ Կարապետյանն իր էջում հրապարակում էր արել, որում նշում էր, որ ընկերությունը քաղաքապետարանից այս ընթացքում տուգանքներ է ստացել բացառապես պայմանագրի համաձայն՝ չկատարած կամ թերի կատարած աշխատանքի համար։ «Սանիթեք» ընկերության վերջին ամիսների, մեղմ ասած, թերի աշխատանքի ապացույցները ամեն քայլափոխի են՝ Երեւանի փողոցներում ու բակերում:
