Պաշտոնյաների ուսանող երեխաների վարձերը և արտասահմանյան հանգստի ծախսերը նույնպես հայտարարագրվելու են. Բադասյան

Կոռուպցիայի դեմ պայքարի 2019-2020 ազգային ռազմավարության քննարկումն է այսօր կազմակերպվել ԱԺ եվրաինտեգրման հարցերի հանձնաժողովում: 

«Իմ քայլի» պատգամավոր Սոնա Ղազարյանն արդարադատության նախարար Ռուստամ Բադասյանին հարցրեց. «Վերջերս Լիտվայում էինք, որտեղ ուսումնասիրում էինք, թե ինչպիսի հայտարարագրում են ներկայացնում, իրենք հայտարարագրում էին ոչ միայն ունեցվածքը, այլ նաեւ ծախսերը, կարող է կաշառք վերցնես առձեռն ու ծախսես ու հայտարարագրում դրա շարժը չի երեւում», ուստի հնարավոր չէ՞, որ Հայաստանում նույնպես ծախսերը հայտարարագրվեն»: 

Նախարարն ասաց, որ գործողությունների ծրագրում դա նախատեսել են, հաջորդ ամիս պատրաստի նախագիծ կունենան, որով նախատեսվում է ուսանող երեխաների դեպքում նրանց վարձերի հայտարարագրումը, արտասահմանյան գործուղումների եւ արտասահմանյան հանգստի ծախսերի հայտարարագրումը, նաեւ հայտարարագիր ներկայացնող պարտականություն ունեցող անձանց շրջանակը կվերանայվի, պաշտոնյայի հետ համատեղ բնակվող անձինք են ընդգրկվելու: Այսինքն, գործողություների ծրագրում դա կա: 


«Իմ քայլի» պատգամավոր Գայանե Աբրահամյանն էլ ասաց. «Հակակոռուպցիոն կոմիտեի կազմավորման սկզբունքը ինձ համար մտահոգիչ է, ինչպես ենք ապահովելու ամբողջական անկախության եւ ինքնուրույնության սկզբունքը»: 

Նախարարը պատասխանեց, որ նախատեսված հակակոռուպցիոն կոմիտեի ղեկավարի ընտրության այնպիսի չափանիշներ են ներդրել, որ նախ մրցույթային հանձնաժողովի կողմից ընտրվի, բայց վարչապետի կողմից կարող է նշանակվի առաջնային տարբերակով. «Հետագայում նախատեսում ենք ԱԺ-ի դերի ու մասնակցության ընդլայնում: Ընդունելի մոդելը աշխարհում, եթե ուզում ենք չքաղաքականացվի, մրցութային հանձնաժողովի ձեւավորումն է, որը կարող է ստուգել թեկնածուի բարեվարքությունը եւ մասնագիտական պատրաստվածությունը»: