Սահմանում ծառայողներին բորբոսնած լավաշ է մատակարարվել
ՀՀ ոստիկանության հատուկ նշանակության զորքերի ծառայող Գագիկ Չարխիֆալակյանը առաջնագծում հերթապահությունից օրերս է վերադարձել։ Aravot.am-ի հետ զրույցում նա նշեց, որ թերեւս առաջին անգամ սահմանում ծառայողներին բորբոսնած լավաշ է մատակարարվել։ «Դեպքը արտառոց էր, չնայած ասում են առողջությանը օգտակար է բորբոսնած հացը»,-կես կատակ-կես լուրջ ասաց նա։ Գագիկ Չարխիֆալակյանը միջադեպի մասին տեղյակ է պահել Ազգային ժողովի «Իմ քայլը» խմբակցության պատգամավոր Սոֆիա Հովսեփյանին։ «Ուզում եմ հատուկ շնորհակալություն հայտնել Սոֆիա Հովսեփյանին, որովհետեւ անմիջապես նրան տեղեկացնելուց հետո իրավիճակ փոխվեց։ Նրան խնդրեցի ուշադրություն դարձնել ՀՀ ՊՆ N զորամասին սնունդ մատակարարող ընկերություններին։ Անմիջապես արձագանքեցին զորամասից, և թե տվյալ զորամասը սպասարկող Ռազմական ոստիկանության ստորաբաժանումից։ Եթե չեմ սխալվում՝ հարուցվել է քրեական գործ»,-ասաց նա։ Գագիկ Չարխիֆալակյանը կարծում է, որ շատերը համամիտ կլինեն, որ չի կարելի սահմանին կանգնողին անորակ սնունդ մատակարարել։ «Վստահ եմ սա առաջին ու վերջին դեպքը կլինի»,-ասաց նա։
