Գագիկ Ծառուկյանի կոնյակի գործարանը չի վճարում բեռնափոխադրումների գումարները. Hetq.am

Խաչատուր Թորոսյանը զբաղվում է բեռնափոխադրումներով, որն իրականացնում է «Եղիա Թորոսյան» ԱՁ-ի միջոցով: Տարվա սկզբին պայմանագիր է կնքել «Դաֆ Ալկո Տրանս» ՍՊԸ-ի հետ, որպեսզի իրենց ավտոմեքենաներով ՍՊԸ-ն «Երևանի Արարատ կոնյակի-գինու-օղու կոմբինատ»-ի ոգելից խմիչքները տեղափոխի Ռուսաստանի Դաշնություն, գրում է Hetq.am-ը: 

Խաչատուր Թորոսյանի խոսքով` «Դաֆ Ալկո Տրանս» ՍՊԸ-ին վարձակալությամբ տրամադրել է 4 բեռնատար ավտոմեքենա, սակայն պարտավորությունները չկատարելու պատճառով «Եղիա Թորոսյան» ԱՁ-ին ՍՊԸ-ն պարտք է 16 մլն 427 հազար դրամ: «Բազմիցս դիմել եմ «Դաֆ Ալկո Տրանս»-ի տնօրենին, ինքն էլ ասում ա, որ գործարանը բեռնափոխադրման գումարը չի փոխանցել, որ ես ձեզ տամ: Ու հիմա չգիտեմ, թե ինչ պետք է արվի»,-ասում է Խաչատուր Թորոսյանը:

«Ֆրեշ Տրանս» ընկերության տնօրեն Արթուր Միրզոյանը ևս պարտատեր է: Նա զանգել էր «Հետքի» խմբագրություն նույն բողոքով: Ասում է, որ ավտոմեքենաները «Դաֆ Ալկո Տրանս» ՍՊԸ-ին վարձակալության տալիս մեքենաների անվադողերը նույնիսկ պարտքով են գնել՝ հույս ունենալով, որ վճարման դեպքում պարտքերը կմարեն: Այժմ էլ վարորդներն են պահանջում իրենց աշխատավարձը, սակայն չեն կարողանում վճարել:

Արթուր Միրզոյանի խոսքով՝ բեռնափոխադրում իրականացնելու պայմանագիր են կնքել «Դաֆ Ալկո Տրանս» ՍՊԸ-ի հետ: 4-5 բեռնատարով ալկոհոլ են արտահանել Ռուսաստանի Դաշնություն: «Դաֆ Ալկո Տրանս» ՍՊԸ-ն «Ֆրեշ Տրանս»-ին պարտք է 4 մլն 166 հազար դրամ: 

«Դիմում ենք «Դաֆ Ալկո Տրանս»-ին, իրանք էլ ասում են «Նոյ» գործարանը մեր փողերը չի տվել, որ մենք էլ տանք: Մենք էլ մնացել ենք երկու քարի արանքում՝ ոչ կարող ենք ընկերությանը պարտադրենք, որովհետև ասում ա՝ փող չունեմ, որ տամ, ոչ էլ կարող ենք վարորդներին ասել՝ աշխատավարձ մի ուզեք»,-ասում է Արթուր Միրզոյանը: 

Մի քանի ընկերությունների տնօրեններ էլ, որոնց պարտք է «Դաֆ Ալկո Տրանս» ՍՊԸ-ն, ասացին, որ եթե կարճ ժամանակահատվածում հարցը չլուծվի, բեռնատարներով բողոքի ակցիա են իրականացնելու կառավարության շենքի դիմաց:

Պարզաբանում ստանալու նպատակով դիմեցինք «Դաֆ Ալկո Տրանս» ՍՊԸ-ի տնօրեն Հայկ Գրիգորյանին: Վերջինս ասաց, որ չի հրաժարվում իր պարտավորությունների կատարումից, սակայն այժմ ֆինանսական ծանր վիճակում է: Հայկ Գրիգորյանը պատմեց, որ զբաղվում են բեռնափոխադրումով: Երկար տարիներ աշխատել է «Երևանի Արարատ կոնյակի-գինու-օղու կոմբինատ»-ի հետ: Ռուսաստանի Դաշնություն է փոխադրել գործարանի արտադրանքը և այնտեղից Հայաստան բերել դատարկ շշերը: Շաբաթվա կտրվածքով կատարել են մինչև 30 բեռնափոխադրում:

«Երևանի Արարատ կոնյակի-գինու-օղու կոմբինատ» ԲԲԸ-ն պատկանում է ԱԺ պատգամավոր Գագիկ Ծառուկյանին:

«Իմ մեքենաները չէին բավականացնում: 25 ընկերություններից վարձակալել եմ մեքենաներ, իրենց մեքենաներով էլ եմ աշխատել: Հիմա ինձ գործարանն այդ գումարը չի վճարում, ես էլ չեմ կարողանում իմ պարտավորությունները կատարել: Հիմա համ ես եմ սնանկության գնում, համ էլ մի քանի ընկերություններ, որոնցից ավտոմեքենաներ եմ վարձակալել»,-ասում է Հայկ Գևորգյանը՝ հավելելով, որ 25 ընկերություններին ունեցած իր պարտքը կազմում է մոտ 84 մլն դրամ: 

Հայկ Գրիգորյանը պարզաբանեց, որ իր հետ փոխկապակցված երկու ընկերություններին «Երևանի Արարատ կոնյակի-գինու-օղու կոմբինատ» ԲԲԸ-ի  ունեցած պարտքը կազմում է մոտ 124 մլն դրամ, որից 121 մլն դրամը՝ «Դաֆ Ալկո Տրանս» ՍՊԸ-ին, մոտ 3 մլն դրամ էլ` «Մակաս» ՍՊԸ-ին: Գրիգորյանը նշեց, որ ունի նաև ռուսական ընկերություն՝ «Շարկ Ալկո Տրանս», որին «Երևանի Արարատ կոնյակի-գինու-օղու կոմբինատ»-ը պարտք է մոտ 390 հազար ռուսական ռուբլի:

«Իմ փաստաբանը դիմել է ընկերությանը՝ խնդրելով 5 աշխատանքային օրվա ընթացքում կատարել վճարումները, սակայն ոչ մի պատճառաբանություն չի ներկայացվել, թե ինչու չեն վճարում գումարները: Մենք նորմալ մեր պարտականությունը կատարել ենք, իրենք էլ բոլոր հաշիվ-ապրանքագրերը ստորագրել են, ոչ մի խնդիր չի առաջացել, ուղղակի չեն վճարում ու վերջ»,-ասում է Հայկ Գրիգորյանը:

Պարտատեր 25 ընկերություններից որոշները ցանկություն ունեն գումարի բռնագանձման հայց ներկայացնել «Դաֆ Ալկո Տրանս» ՍՊԸ-ի դեմ: Այդ հարցով ընկերությունների տնօրեններն արդեն դիմել են «Դաֆ Ալկո Տրանս» ՍՊԸ-ին, սակայն վերջինիս տնօրենը խնդրել է մի քիչ էլ համբերել: Փոխարենը «Երևանի Արարատ կոնյակի-գինու-օղու կոմբինատ» ԲԲԸ-ի դեմ գումարի բռնագանձման պահանջով հայցադիմումներ են ներկայացրել «Դաֆ Ալկո Տրանս» և «Մակաս» ՍՊԸ-ները:

««Դաֆ Ալկո Տրանս» ՍՊԸ-ն արդեն սնանկության եզրին է, որովհետև չենք կարողանում մեր պարտականությունները կատարել պետության և նշածս 25 ընկերությունների նկատմամբ»,-ասում է Հայկ Գրիգորյանը: 

«Դաֆ Ալկո Տրանս» ՍՊԸ-ի և «Երևանի Արարատ կոնյակի-գինու-օղու կոմբինատ» ԲԲԸ-ի միջև 2019թ. հունվարի 8-ին կնքվել է «Բեռի փոխադրման մասին» պայմանագիր, համաձայն որի` «Դաֆ Ալկո Տրանս» ՍՊԸ-ն որպես փոխադրող պարտավորվել է գործարանի կողմից իրեն վստահված բեռները հասցնել պատվիրված վայրերը և հանձնել բեռները ստացողին: Բեռի փոխադրման գինը սահմանվել է ըստ հաշիվ-ապրանքագրերի: Կողմերը սահմանել են վճարման կարգ, համաձայն որի` գործարանը բեռնափոխադրող ընկերությանը վճարում է 60% կանխավճար՝  մեքենան կապարակնքելուց անմիջապես հետո, իսկ գումարի մնացած 40%-ը` բեռը փոխադրման վայր հասցնելուց և մաքսային զննումից հետո:

29.03.2019 թվականին դուրս գրված ծառայությունների մատուցման և աշխատանքների կատարման  հաշիվ վավերագրերի համաձայն՝ «Դաֆ Ալկո Տրանս» ՍՊԸ-ն կատարել է շշերի փոխադրում Ռուսաաստանի Դաշնության Ռոսլավլ քաղաք և շշերի ու խցանների փոխադրում Մոսկվա և Գուս Խրուստալնի քաղաքներ, սակայն «Երևանի Արարատ կոնյակի-գինու-օղու կոմբինատ» ԲԲԸ-ն մինչ օրս բեռնափոխադրման պայմանագրով սահմանված գումարները չի վճարել: 

Դեռևս ապրիլի 17-ին «Դաֆ Ալկո Տրանս»-ի ներկայացուցիչը գրավոր դիմել է գործարանի տնօրինությանը՝ պայմանագրով նախատեսված գումարը վճարելու մասին պահանջով, սակայն որևէ պատասխան չի ստացել:

«Դաֆ Ալկո Տրանս» ՍՊԸ-ն գումարի բռնագանձման պահանջով ընդդեմ գինու-օղու կոմբինատի դիմել է Երևան քաղաքի ընդհանուր իրավասության դատարան: 

Նույն պայմաններով և նույն քաղաքներ բեռնափոխադրում իրականացնելու պայմանագիր հունվարի 8-ին կնքվել է նաև «Մակաս» ՍՊԸ-ի և «Երևանի Արարատ կոնյակի-գինու-օղու կոմբինատ» ԲԲԸ-ի միջև: Մինչ օրս բեռնափոխադրման պայմանագրով սահմանված գումարները չեն վճարվել: «Մակաս»-ի ներկայացուցիչը դարձյալ գրավոր դիմել է գործարանի տնօրինությանը՝ պայմանագրով նախատեսված գումարը վճարելու պահանջով, սակայն մնացել է անպատասխան: 

«Մակաս» ՍՊԸ-ն գումարի բռնագանձման պահանջով հունիս ամսին դիմել է Երևան քաղաքի ընդհանուր իրավասության դատարան: Հայցադիմումն ընդունվել է վարույթ:

Պարզաբանում ստանալու նպատակով զանգահարեցինք «Երևանի Արարատ կոնյակի-գինու-օղու կոմբինատ»: Գործավար ներկայացած Լենա անունով աշխատակիցը, լսելով հարցը, որոշ ժամանակ անց զանգահարեց և փոխանցեց «Մուլտի Գրուպ» կոնցեռնի տնօրենների խորհրդի նախագահ Սեդրակ Առուստամյանի խոսքը. «Դա զրպարտանք է, տվյալ սուբյեկտը դիմել է դատարան և դատարանի միջոցով ամեն ինչ կպարզվի, կտեսնենք, որ դա զրպարտանք է: Այդքան բան»: