Տավուշում 200 թափուր աշխատատեղ կա, բայց Իջևանի ցուցարարները հրաժարվել են դրանցից. Մանրամասներ
Այսօր կառավարության նիստի ժամանակ վարչապետ Նիկոլ Փաշինյանը հիշեցրեց, որ նախորդ տարի անտառամերձ տարածքների բնակիչներին անտառի թափուկներ են բաժանվել, իսկ ոմանց էլ դրամաշնորհներ են տրվել՝ այլ ոլորտում գործունեություն սկսելու համար։
Տարածքային կառավարման եւ ենթակառուցվածքների նախարար Սուրեն Պապիկյանը զեկուցեց, որ երեկվա ցույցերի շատ մասնակիցների նույնիսկ աշխատանք է առաջարկվել ճանապարհաշինության ոլորտում, քանի որ Տավուշում ճանապարհաշինության մեջ աշխատուժի պակաս կա։
«Ընդհանուր, տարբեր տեղերում, ոչ միայն ճանապարհաշինության մեջ, այլեւ մարզի այլ տեղերում շուրջ 200 աշխատատեղի մասին էր երեկ խոսում մարզպետը»,- ասաց Պապիկյանը։
Արձագանքելով Պապիկյանին՝ վարչապետն ասաց. «Այսինքն, էդ մարդիկ, որոնք ասում են, որ «մենք մեր հացի փողն ենք աշխատում», հիմա 200 հոգի կարող են ընդունվել աշխատանքի հա՞»:
«Այո, առաջարկը հնչել է մարզպետի կողմից, չեն արձագանքել մարզպետին, ասել են, որ մենք ունենք մի պահանջ, եւ այդ պահանջը պիտի կատարվի»,- նշեց Պապիկյանը։
Նախարարը նշեց, որ ցուցարարներին ասել են՝ այդ պահանջը չի կատարվելու։ Վարչապետն ավելացրեց, որ հենց այսօր մարզպետարան դիմելու դեպքում մարդիկ կարող են աշխատանքի ընդունվել օրական 8-15 հազար դրամ աշխատավարձով:
