Կենտրոնում առնետների քաղաքակրթություն է ձևավորվում. ահազանգ
Ֆեյսբուքյան օգտատեր Էվելինա Քանթարչյանն իր էջում գրառում է կատարել և հայտնել, որ Երևանի կենտրոնում բազմաթիվ առնետներ կան.
«Հարգելի ֆեյսբուքահայություն, արդեն տևական ժամանակ լռում ու համբերում եմ, սակայն արդեն համբերելն անհնար է, նյարդերս իսկապես տեղի են տալիս: Քաղաքի կենտրոնում, տուրիստների քթի տակ առնետների քաղաքակրթություն է արդեն ձևավորվում: Կողբացի փողոցի (Ամիրյանը հատող) 3-րդ շենքի աղբատարն արդեն տևական ժամանակ չի մաքրվում: Մոտ շաբաթ առաջ բնակիչների նախաձեռնությամբ մաքրվեց, առնետներն այդ ժամանակ հասել էին 9-րդ հարկ, հիմա նույն վիճակն է: Գիշերը շենքի դիմացի ասֆալտն առնետներով է լցվում: Քիչ առաջ զանգահարել եմ քաղաքապետարանի թեժ գիծ, գոռացել, պահանջել, հուզվել եմ: Հպարտ քաղաքացի չի կարող լինել, եթե գերատեսչության համար ձայնդ անհասանելի է: Եթե տեսնեիք` ինչ ահով ենք վերելակից դուրս վազում, երեխաներիս սթրեսը:
Հ.Գ. Բոլոր ընկերներիս, ում նշել եմ, խնդրում եմ օգնել տարածմանն ու հիշեցնել պատասխանատու մարդկանց իրենց պարտականությունների մասին»:
