Ոստիկանության Նոր Նորքի բաժնի հետաքննչական բաժանմունքում նյութեր են նախապատրաստվում Երևանի բնակիչ Հայկանուշ Աբգարյանի դիմումի փաստով։ Ինչպես հայտնում է Shamshyan. com-ը՝ վերջինս դիմել է ՀՀ գլխավոր դատախազություն և հայտնել, որ ապրիլի 6-ին Երևանում տեղի ունեցած ավտովթարի հետևանքով ամուսինը՝ Երևանի բնակիչ, 48-ամյա Կարեն Հակոբյանը, մարմնական վնասվածքներով տեղափոխվել է «Սուրբ Գրիգոր Լուսավորիչ» բժշկական կենտրոն, որտեղ բժիշկների կողմից կատարվել են մասնագիտական պարտականությունների ոչ պատշաճ գործողություններ։ Դրանից հետո ամուսինը տեղափոխվել է «Իզմիրլյան» բժշկական կենտրոն, որտեղ մահացել է ։ Հ. Աբգարյանը ամուսնու մահվան մեջ մեղադրում է բժիշկներին և խնդրել է իրավապահներին՝ կատարեն նախաքննություն և բողոքը Նոր Նորքի դատախազության կողմից ՀՀ քրեական դատավարության 180-181 հոդվածների կարգով ուղարկվել է ոստիկանության նոր Նորք բաժին։ Ինչպես ավելի վաղ հայտնել էինք՝ ապրիլի 9-ին Երևանի «Իզմիրլյան» բժշկական կենտրոնում մահացել էր Երևանի բնակիչ՝ 48-ամյա Կարեն Հակոբյանը, ով ծայրահեղ ծանր ախտորոշմամբ հիվանդանոց էր տեղափոխվել ապրիլի 6-ին Երևանում՝ Թբիլիսյան խճուղում, «Գազպրոմ Արմենիա» ընկերության դիմաց տեղի ունեցած խոշոր ավտովթարի հետևանքով։