Նյու Յորքում առաջին անգամ մահմեդական քաղաքապետ է ընտրվել

ԱՄՆ-ի երեքշաբթի կայացած տեղական ընտրությունների արդյունքում 34-ամյա դեմոկրատ Զոհրան Մամդանին դարձել է Նյու Յորքի քաղաքապետ։

ԱՄՆ-ի մի շարք նահանգներում երեքշաբթի օրը անցկացվել են նահանգապետերի, քաղաքապետերի և տեղական ինքնակառավարման մարմինների ընտրություններ։ Ամենանշանավոր արդյունքներից էր 34-ամյա դեմոկրատ Զոհրան Մամդանիի հաղթանակը Նյու Յորքում։ Նա դարձել է քաղաքի պատմության մեջ առաջին մահմեդական և վերջին հարյուր տարվա ընթացքում ամենաերիտասարդ քաղաքապետը։

Նախնական արդյունքներով՝ Մամդանին ստացել է նյույորքցիների ձայների մոտ կեսը։ Քաղաքական գործիչը, որը իրեն ժողովրդավարական սոցիալիստ է համարում, քարոզարշավի ընթացքում հանդես է եկել Նյու Յորքը սոցիալական հավասարության վրա հիմնված քաղաք դարձնելու գաղափարով։

Նրա ծրագրերում ընդգրկված են վարձավճարների սառեցում, անվճար ավտոբուսային երթուղիների գործարկում, քաղաքային սուբսիդավորմամբ սուպերմարկետների բացում և մի շարք այլ միջոցառումներ՝ բնակչության ամենահարուստ շերտի հարկերի բարձրացման հաշվին կյանքի արժեքը նվազեցնելու նպատակով։

Հիշեցնենք, որ Դոնալդ Թրամփը հայտարարել էր՝ կկրճատի Նյու Յորքի ֆինանսավորումը, եթե դեմոկրատ թեկնածու Մամդանին ընտրվի քաղաքապետ։