Պեսկովը` Ռուսաստանում սպասվող նոր մոբիլիզացիա անցկացնելու լուրերի մասին

Կրեմլի ներկայացուցիչ Դմիտրի Պեսկովը հերքել է Ռուսաստանում նոր մոբիլիզացիա անցկացնելու մասին տարածվող լուրերը՝ դրանք որակելով կիևյան ռեժիմի կողմից տարածվող տեղեկատվական ստահոդ լուրեր։

ՌԴ նախագահի մամուլի քարտուղար Դմիտրի Պեսկովը Ռուսաստանում իբր նոր զորահավաքի վերաբերյալ լուրերը բնութագրել է որպես «տեղեկատվական ստահոդ լուրեր», որոնք միտումնավոր կերպով շրջանառության մեջ են դնում ուկրաինական իշխանությունները։ RTVI-ի հետ զրույցում Կրեմլի ներկայացուցիչը մասնավորապես նշել է. «Գիտեք, այդ ամենը շրջանառության մեջ են դնում ուկրաինական իշխանությունները։ 

Բնականաբար, [կիևյան] ռեժիմը փորձում է գաղափարապես ապակայունացնել իրավիճակը մեր երկրում։ Դրանք բոլորն այնպիսի տեղեկատվական ստահոդ լուրեր են, որոնք նպատակադրված նետվում են տեղեկատվական դաշտ»։ Դրանից առաջ Զելենսկին մի քանի անգամ հայտարարել էր, թե ռուսական իշխանությունները իբրև թե մտադիր են առաջիկա աշնանը նոր զորահավաք կազմակերպել։ Նմանատիպ տեղեկություններ բազմիցս շրջանառվել էին նաև ուկրաինական լրատվամիջոցներում։