Ամուրի գազաքիմիական համալիրում հրդեհի հետևանքով 5 մարդ է տուժել

Ամուրի գազաքիմիական համալիրում բռնկված հրդեհի հետևանքով հինգ մարդ տարբեր աստիճանի վնասվածքներով հոսպիտալացվել է։

Ձեռնարկության մամուլի ծառայության հաղորդմամբ՝ հրդեհի օջախը տեղայնացվել է, կրակի հետագա տարածման վտանգ չկա։ Ներկայում վերահսկվող պայմաններում այրվում են տեխնոլոգիական գազերի մնացորդները։

Նախնական տվյալներով՝ հրդեհը բռնկվել է պիրոլիզի կայանքի օժանդակ տեխնոլոգիական հատվածում։ Համալիրի հիմնական սարքավորումները չեն վնասվել։

Թեթև վնասվածքներ՝ կտրվածքներ և սալջարդեր ստացած մյուս անձանց տեղում բժշկական օգնություն է ցուցաբերվել։

Միջադեպից հետո մեկնարկել է այն սարքավորումների կանգնեցման գործընթացը, որոնք գտնվում էին գործարկման և կարգաբերման փուլում։ Արտակարգ իրավիճակի վերացման աշխատանքներում չներգրավված աշխատակիցները տարհանվել են։

Հրդեհի պատճառները պարզելու համար հանձնաժողով է ստեղծվել։

Ամուրի գազաքիմիական համալիրի շինարարությունը ռուսական «Սիբուրի» (60%) և չինական Sinopec-ի (40%) համատեղ նախագիծն է։ Այն պոլիէթիլենի և պոլիպրոպիլենի արտադրության աշխարհի խոշորագույն ձեռնարկություններից մեկն է։