Ռոբերտ Քոչարյանի մոտ զարկերակային բարձր ճնշում է արձանագրվել․ նա տեղափոխվել է հիվանդանոց

ՀՀ երկրորդ նախագահ Ռոբերտ Քոչարյանի ինքնազգացողությունը վատացել է։ Այս մասին հայտնում է Հակակոռուպցիոն կոմիտեն։

Ըստ կոմիտեի՝ Քոչարյանի մոտ արձանագրվել է զարկերակային բարձր ճնշում, ինչի պատճառով հրավիրվել է շտապօգնություն։

Հետագա հետազոտության նպատակով նա տեղափոխվել է համապատասխան բժշկական հաստատություն։

Ռոբերտ Քոչարյանի գրասենյակից էլ հայտնել են, որ նախկին նախագահը վերջերս բժշկական միջամտության է ենթարկվել։

«Ներկա պահին բժիշկը, ելնելով այդ փաստից, հավելյալ հետազոտության կարիք է տեսել»,- հայտնել է Ռոբերտ Քոչարյանի գրասենյակի ղեկավար Բագրատ Միկոյանը։

Հիշեցնենք, որ Ռոբերտ Քոչարյանը ձերբակալվել է՝ կալանքը որպես խափանման միջոց ընտրելու վերաբերյալ միջնորդություն դատարան ներկայացնելու նպատակով։