Ռուսական բանակը վերահսկողության տակ է վերցրել ԴԺՀ-ի Վոդյանսկոյե բնակավայրը․ ՌԴ ՊՆ

Ռուսական բանակը վերահսկողության տակ է վերցրել Դոնեցկի Ժողովրդական Հանրապետության Վոդյանսկոյե բնակավայրը։ Այս մասին ամենօրյա ճեպազրույցի ժամանակ հայտարարել է Ռուսաստանի պաշտպանության նախարարությունը։

Գերատեսչության տվյալներով՝ բնակավայրը զբաղեցրել են ռուսական զորքերի «Կենտրոն» խմբավորման ստորաբաժանումները։

ՌԴ ՊՆ-ն նաև պնդում է, որ ռուսական ուժերը հարվածներ են հասցրել Ուկրաինայի զինված ուժերի հինգ բրիգադների, ծովային հետևակի երկու և Ազգային գվարդիայի չորս բրիգադների կենդանի ուժին ու տեխնիկային՝ Բելոզերսկոյե, Դոբրոպոլյե, Գրուզսկոյե, Յուրևկա, Ռայսկոյե, Աննովկա, Նովոֆեդորովկա, Մատյաշևո և Դնեպրոպետրովսկի մարզի Մարյևկա բնակավայրերի շրջաններում։

ՌԴ պաշտպանության նախարարության պնդմամբ՝ մեկ օրվա ընթացքում «Կենտրոն» խմբավորման պատասխանատվության գոտում ուկրաինական կողմը կորցրել է մինչև 380 զինծառայող, 6 զրահամեքենա, 7 ավտոմեքենա, մեկ հրետանային համակարգ և ռադիոէլեկտրոնային պայքարի 2 կայան։

Ավելի վաղ «Ազգային պաշտպանություն» ամսագրի խմբագիր Իգոր Կորոտչենկոն հայտարարել էր, որ 2026 թվականի առաջին յոթ ամիսներին Ուկրաինայի զինված ուժերի կորուստները կազմել են 280 հազար մարդ։ Նրա տվյալներով՝ ամենամեծ կորուստները գրանցվել են «Կենտրոն» և «Արևելք» զորախմբերի պատասխանատվության գոտիներում։