Թրամփն ու Կիմ Չեն Ընը կարող են կրկին հանդիպել այս աշնանը

ԱՄՆ նախագահ Դոնալդ Թրամփը մտադիր է ընթացիկ աշնանը հանդիպում ունենալ Հյուսիսային Կորեայի ղեկավար Կիմ Չեն Ընի հետ՝ միջուկային ծրագրի շուրջ քննարկումները վերսկսելու նպատակով:

Ըստ The Wall Street Journal-ի հաղորդած տեղեկատվության, որը հիմնված է ամերիկացի պաշտոնյաների փոխանցած տվյալների վրա, կողմերի հանդիպումը հնարավոր է կայանա նոյեմբերին չինական Շենժեն քաղաքում, որտեղ անցկացվելու է Ասիա-խաղաղօվկիանոսյան տնտեսական համագործակցության գագաթնաժողովը: Այնուամենայնիվ, WSJ-ի աղբյուրները շեշտում են, որ հանդիպման անցկացման պաշտոնական նախապատրաստություն դեռևս չի մեկնարկել:

Սրանից առաջ Միացյալ Նահանգների ղեկավարը հրահանգել էր նվազեցնել ԱՄՆ-ի և Հարավային Կորեայի ամենամյա Ulchi Freedom Shield (UFS) համատեղ զորավարժությունների մասշտաբները, որոնք կազմակերպվում են ԿԺԴՀ-ի հետ հնարավոր բախումներին դիմակայելու պատրաստվածության համար:

Միացյալ Նահանգների նախագահի պնդմամբ՝ ռազմական այդ վարժանքները չափազանց ծախսատար են, իսկ «դրանց ֆինանսավորման մեծ մասը կատարում է հենց ԱՄՆ-ն»: Թրամփը նաև նշել է, որ դրանք «բոլորովին անհարկի ագրեսիվ ազդակ են հղում Հյուսիսային Կորեային»:

Թրամփի նախագահության առաջին ժամկետի ընթացքում երկու երկրների ղեկավարները հանդիպել են երեք անգամ, սակայն այդ բանակցությունները Հյուսիսային Կորեայի միջուկային ծրագրի շուրջ որևէ համաձայնագրի ստորագրմամբ չեն ավարտվել: