Շվեյցարիան միացել է ՌԴ-ի դեմ ԵՄ պատժամիջոցների մի մասին

Շվեյցարիայի իշխանություններն ընդլայնել են Ռուսաստանի դեմ պատժամիջոցները՝ ընդունելով ԵՄ պատժամիջոցների 20-րդ փաթեթով նախատեսված մի շարք միջոցառումներ։ Այս մասին ասվում է երկրի Դաշնային խորհրդի՝ կառավարության հաղորդագրությունում։

«Օգոստոսի 19-ին Դաշնային խորհուրդը որոշում է ընդունել Ռուսաստանի դեմ ԵՄ պատժամիջոցների 20-րդ փաթեթից լրացուցիչ միջոցառումներ կիրառելու մասին»,- նշվում է հաղորդագրությունում։

Նոր միջոցառումներն ուժի մեջ կմտնեն օգոստոսի 20-ին և կվերաբերեն էներգետիկ, առևտրային և ֆինանսական ոլորտներին։

Մասնավորապես, էներգետիկ ոլորտում արգելքներ են սահմանվում հեղուկացված բնական գազ տեղափոխող տանկերների և սառցահատների, ինչպես նաև Ռուսաստանում ՀԲԳ տերմինալների սպասարկման նկատմամբ։ Արգելվում է նաև Ռուսաստանին տանկերների վաճառքը։ Երրորդ երկրներին տանկերների վաճառքի պայմանագրերում պետք է ներառվի դրանք Ռուսաստանին վերավաճառելն արգելող դրույթ։

Առևտրի ոլորտում Շվեյցարիան նոր համակարգ է կիրառելու՝ նախկինում սահմանված պատժամիջոցների շրջանցումը կանխելու համար։ Մասնավորապես, արգելվելու է որոշ ապրանքների արտահանումը Ղրղզստան։

Ֆինանսական ոլորտում արգելվել է ռուսական կրիպտոակտիվների փոխանակման և փոխանցման հարթակների օգտագործումը։ Շվեյցարիան նաև արգելել է մի շարք ռուսական թվային ակտիվների, այդ թվում՝ թվային ռուբլու աջակցությունը։

Նշվում է, որ դեռ մայիսի 22-ին Շվեյցարիան այս փաթեթից 115 ֆիզիկական և իրավաբանական անձանց ներառել էր իր պատժամիջոցների ցանկերում։

ԵՄ պատժամիջոցների 20-րդ փաթեթն ընդունվել է ապրիլին, իսկ վերջին՝ 21-րդ փաթեթը՝ հուլիսին։