Ռուսաստանում նոր զորահավաք կարող է հայտարարվել․ փորձագետները՝ հնարավոր ժամկետների մասին

The New York Times-ի տվյալներով՝ արևմտյան որոշ պաշտոնյաներ և վերլուծաբաններ կարծում են, որ սեպտեմբերին ՌԴ Պետդումայի ընտրություններից հետո Վլադիմիր Պուտինը կարող է նոր զորահավաք հայտարարել՝ չնայած հասարակության շրջանում դրա ոչ ժողովրդական լինելուն։

«Ստրատեգիա XXI» կենտրոնի ռազմական ծրագրերի ղեկավար Պավել Լակիյչուկի գնահատմամբ՝ Ռուսաստանը ներկայում կարող է ամսական բանակ ներգրավել շուրջ 30-35 հազար մարդու։ Նրա խոսքով՝ այդ ցուցանիշը մոտավորապես համադրելի է ռուսական ուժերի՝ սպանվածների և վիրավորների ամսական կորուստների վերաբերյալ ուկրաինական կողմի գնահատականների հետ։

Լակիյչուկը պնդում է, որ վերջին ամիսներին այդ կորուստները կազմել են ամսական շուրջ 30-35 հազար, իսկ հուլիսին, ըստ ուկրաինական կողմի տվյալների, հասել են 40-46 հազարի։ Նրա գնահատմամբ՝ նման պայմաններում Ռուսաստանը դժվարանում է միաժամանակ լրացնել կորուստները և նոր հարձակման համար անհրաժեշտ պահուստներ կուտակել։

Փորձագետները չեն բացառում, որ նոր զորահավաքը կարող է կապված լինել առաջիկա ձմռանը Ռուսաստանի հնարավոր հարձակողական գործողությունների ակտիվացման հետ։ NYT-ն ավելի վաղ գրել էր, որ Մոսկվան կարող է ձմռանը ուժեղացնել ինչպես ռազմաճակատային գործողությունները, այնպես էլ Ուկրաինայի ենթակառուցվածքների դեմ հարվածները։

Ուկրաինայի նախագահ Վլադիմիր Զելենսկին օգոստոսի սկզբին նաև հայտարարել էր, որ Ռուսաստանը պատրաստվում է Հյուսիսային Կորեայից ներգրավել ևս 30-50 հազար զինծառայողի։