Ուկրաինական հարվածի հետևանքով վնասվել է Սամարայի արդյունաբերական ենթակառուցվածքը

Ուկրաինայի զինված ուժերը հրթիռային հարված են հասցրել Ռուսաստանի Սամարայի մարզում գտնվող արդյունաբերական օբյեկտի։ Այս մասին օգոստոսի 15-ին հայտնել է մարզի նահանգապետ Վյաչեսլավ Ֆեդորիշչևը։

Նրա խոսքով՝ Սամարայի մարզը ենթարկվել է զանգվածային հարձակման, որի հետևանքով վնասվել են Սամարայի արդյունաբերական ենթակառուցվածքների առանձին հատվածներ։ Ստեղծվել է արտակարգ իրավիճակների արձագանքման խումբ, տուժածներին բժշկական օգնություն է ցուցաբերվել։

Ուկրաինական աղբյուրների տվյալներով՝ հարվածի թիրախը կարող էր լինել Ռուսաստանի հրթիռատիեզերական արդյունաբերության խոշոր ձեռնարկություններից մեկը՝ «Պրոգրես» հրթիռատիեզերական կենտրոնը։ Այն արտադրում է կրող հրթիռներ և տիեզերական սարքեր։ Կենտրոնի հարևանությամբ գտնվում է նաև «Ավիակոր» գործարանը, որտեղ իրականացվում են ռուսական ինքնաթիռների վերանորոգման և արդիականացման աշխատանքներ։

Astra-ի հրապարակած OSINT վերլուծության համաձայն՝ Սամարայում հրդեհը բռնկվել է «Պրոգրես» կենտրոնին պատկանող արտադրամասերից մեկում կամ հարակից ավիացիոն գործարանի տարածքում։

Նույն գիշեր անօդաչու թռչող սարքերի հարձակումների մասին հաղորդվել է նաև Մոսկվայի մարզում։ Նահանգապետ Անդրեյ Վորոբյովի խոսքով՝ Դոմոդեդովոյում ԱԹՍ-ն հարվածել է մասնավոր տան, ինչի հետևանքով վիրավորվել են 55-ամյա կին և 9-ամյա երեխա։ Երեխայի վիճակը գնահատվում է ծանր։

Օգոստոսի 15-ի գիշերը հարձակումների մասին հաղորդվել է նաև Պենզայի, Յարոսլավլի և Ռոստովի մարզերում, ինչպես նաև Ռուսաստանի կողմից բռնակցված Ղրիմում։

Պենզայի մարզում, տեղական իշխանությունների տվյալներով, ԱԹՍ-ի հարվածից հրդեհ է բռնկվել արդյունաբերական գոտում գտնվող գյուղատնտեսական ձեռնարկությունում։ Հրդեհը մարվել է, զոհեր և վիրավորներ չկան։

Յարոսլավլի մարզի նահանգապետ Միխայիլ Եվրաևը հայտնել է հինգ ԱԹՍ-ի խոցման մասին՝ նշելով, որ տուժածներ և օբյեկտների վնասներ չկան։

Ռոստովի մարզում, իշխանությունների տվյալներով, հակաօդային պաշտպանության ուժերը երեք շրջաններում ոչնչացրել են մոտ մեկ տասնյակ ԱԹՍ և հրթիռ։ Միլլերովսկի շրջանում վնասվել են էլեկտրահաղորդման գծեր, ինչի հետևանքով յոթ բնակավայրերի շուրջ 1000 բնակիչ մնացել է առանց էլեկտրաէներգիայի։

Սևաստոպոլում Ռուսաստանի կողմից նշանակված ղեկավար Միխայիլ Ռազվոժաևն էլ հայտնել է հինգ ԱԹՍ-ի խոցման մասին։